Сарвари давлат Эмомалӣ Раҳмон дар идомаи сафари корӣ дар вилояти Суғд ба ноҳияи Ашт ташриф оварданд

Апрель 16, 2022 08:00

ДУШАНБЕ, 16.04.2022 /АМИТ «Ховар»/. 16 апрел Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ дар шаҳру ноҳияҳои вилояти Суғд, ба ноҳияи Ашт ташриф оварданд.

Сарвари давлат муҳтарам Эмомалӣ Раҳмон дар ноҳияи Ашт нахуст, дар маҳаллаи Кӯҳсори деҳоти Понғоз хати оби полезиро мавриди истифода қарор дода, ба бунёди боғи интенсивии «Ибрат» оғоз бахшиданд.

Иншооти асосии хати оби полезӣ бо кофта шудани 4 чоҳи амудӣ аз чуқурии 25 метр омода карда шуда, барои обёрии 14 гектар замини ин мавзеъ пешбинӣ гардидааст

Оби полезӣ аз чоҳҳои амудӣ тавассути дастгоҳҳои обкашӣ (насосҳо) кашида шуда, ба ҳавзи бунёдгардида бо ғунҷоиши 600 метри мукааб оварда мешавад ва сипас аз тариқи қубурҳои обдиҳӣ заминҳои ин мавзеъ бо усули муосир, яъне қатрагӣ обёрӣ мегарданд.

Ташаббуси обёрии қитъаҳои ин мавзеи кӯҳдоман дар асоси дастуру роҳнамоии Сарвари давлат муҳтарам Эмомалӣ Раҳмон аз ҷониби соҳибкори ватанӣ Зайлобиддин Махсудҷонов рӯи даст гирифта шуда, ҳадаф аз он ба гардиш даровардани талу тепаҳои бекорхобида ва истифодаи самараноку мақсадноки заминҳои ин минтақа мебошад.

Кашида шудани хати оби полезӣ ҳамакнун барои ба гардиш даровардани қитъаҳои нав ва бунёди боғу токзорҳои интенсивӣ ва суперинтенсивӣ дар талу тепаҳои ин мавзеъ мусоидат намуда, бо ин роҳ метавон аз шӯршавии заминҳо пешгирӣ намуд.

Дар ҳамин ҷо, Президенти Ҷумҳурии Тоҷикистон муҳтарам Эмомалӣ Раҳмон, бо шинонидани ниҳоли гелос ба бунёди боғи нав дар масоҳати 14 гектар асос гузошта, аз Намоиши дастранҷи хоҷагидорони деҳоти Понғоз дидан намуданд.

Боғи мазкур бо усули замонавӣ, яъне интенсивӣ бунёд карда шуда, дар он 6 навъ гелоси содиротӣ, аз ҷумла “Александрия”, “Регина” ва “Дайбера” дар асоси маслиҳати мутахассисон аз рӯи меъёри 2 бар 4 метр шинонида шуда, дар ҳар як гектар 1250 бех ниҳол рост омадааст.

Дар маҷмӯъ дар асоси нақша дар боғи нав беш аз 15 ҳазор бех ниҳоли гелоси қадпаст, ки аз Федератсияи Русия дар асоси таҷриба ва маслиҳати мутахассисон бо кафолати тӯлонӣ дастрас гардидааст, шинонида шуд.

Ниҳолҳои гелос бо риояи пурраи қоидаҳои агротехникӣ шинонида шуда, ба иттилои масъулон дар соли сеюм пурра ба ҳосил медароянд.

Иттилоъ дода шуд, ки дар ноҳияи Ашт гелос мевае мебошад, ки боғдорон метавонанд аз он ҳамасола ҳосили дилхоҳ ба даст овард. Бо бунёди боғи нави гелос то 200 нафар сокинони маҳаллӣ бо дарназардошти корҳои мавсимӣ бо ҷойи кор таъмин мегарданд.

Дар намоиши кишоварзӣ аҳли заҳмати деҳоти Понғози ноҳияи Ашт 15 навъи маҳсулот, аз ҷумла 8 навъ зардолуи хушки донакдору бедонаи содиротӣ, 3 намуд себу нок ва ғалладонагиҳоро, ки ҳамасола дар заминҳои дар ихтиёрдошта кишту парвариш мекунанд, муаррифӣ намуданд.

Дар деҳоти Понғози ноҳияи Ашт зиёда аз 1000 хоҷагии деҳқонӣ фаъолият дошта, кишоварзон ҳамасола бо истифодаи пурсамари ҳар як қитъа замин ва тухмиҳои серҳосили зироат, дар асоси маслиҳати мутахассисони соҳа маҳсулоти фаровон ба даст меоранд.

Аснои боздиди Пешвои миллат муҳтарам Эмомалӣ Раҳмон аз намоиши дастранҷи меҳнаткашон иттилоъ дода шуд, ки дар деҳоти Понғоз 3484 гектар боғ мавҷуд буда, соли равон наздики 20 гектар боғи интенсивӣ бунёд карда шудааст.

Сарвари давлат муҳтарам Эмомалӣ Раҳмон зимни суҳбат бо масъулону хоҷагидорон бо инобати вазъи имӯзаи ҷомеаи ҷаҳонӣ, аз ҷумла камбуди маводи ғизоӣ дар баъзе аз давлатҳои дунё барои истифодаи мақсадноку бомавриди заминҳои дар ихтиёрдошта, аз ҷумла қитъаҳои ёрирасону наздиҳавлигӣ, зиёд кардани майдони боғҳои меваҳои лазизу шаҳдбори ватанӣ ва бо ин роҳ афзун намудани ҳаҷми истеҳсоли маҳсулоти босифати худӣ ба онҳо дастуру маслиҳатҳои муфид доданд.

Оғози сафари корӣ дар ноҳияи Ашт, ба истифода додани хати оби полезӣ, бунёди боғи нави гелос ва боздид аз намоиши кишоварзӣ 16.04.2022

Апрель 16, 2022 08:00

Хабарҳои дигари ин бахш

Пешвои миллат Эмомалӣ Раҳмон пас аз анҷоми сафари корӣ дар Вилояти Мухтори Кӯҳистони Бадахшон ба шаҳри Душанбе баргаштанд
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони Вилояти Мухтори Кӯҳистони Бадахшон мулоқот намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони Вилояти Мухтори Кӯҳистони Бадахшон
Президенти Ҷумҳурии Тоҷикистон Эмомалӣ Раҳмон дар шаҳри Хоруғ дар тантанаҳои идона ба ифтихори 28-солагии Рӯзи ваҳдати миллӣ иштирок намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон ба ифтихори 28-солагии Рӯзи ваҳдати миллӣ
Сарвари давлат Эмомалӣ Раҳмон дар шаҳри Хоруғ бинои нави истиқоматии 5-ошёна барои хизматчиёни давлатиро мавриди истифода қарор доданд
Пешвои миллат Эмомалӣ Раҳмон дар ҳудуди Парки технологии шаҳри Хоруғ коргоҳҳои истеҳсолии маҳсулоти гӯштӣ ва обҳои табиии ташнашиканро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ бо лоиҳаҳои биноҳои истиқоматӣ бо маркази хизматрасонию тиҷоратӣ, таваққуфгоҳи нақлиётӣ, меҳмонхона ва майдончаи варзишии кӯдакон шинос шуданд
Сарвари давлат Эмомалӣ Раҳмон дар шаҳри Хоруғ китобхонаи кӯдаконаи вилоятӣ, китобхонаи шаҳрии ба номи Ҳофизи Шерозӣ ва Маркази рушди зеҳни сунъиро ифтитоҳ намуданд
Пешвои миллат Эмомалӣ Раҳмон дар шаҳри Хоруғ Маркази фарҳангӣ, савдо ва Шурои иттифоқҳои касабаи вилоятро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ чойхонаи Хатлонро ба истифода доданд
Сарвари давлат Эмомалӣ Раҳмон дар шаҳри Хоруғ пули мошингузарро мавриди баҳрабардорӣ қарор доданд