Сифати хизматрасонии сайёҳӣ дар гузаргоҳҳои сарҳади давлатӣ ва фурудгоҳҳои байналмилалии Тоҷикистон беҳтар мегардад

ДУШАНБЕ, 04.04.2022 /АМИТ «Ховар»/. Кумитаи рушди сайёҳӣ ҷиҳати иҷрои дастуру супоришҳои Пешвои миллат бобати таъмини хизматрасонии сатҳи баланд дар гузаргоҳҳои сарҳади давлатӣ ва фурудгоҳҳои байналмилалӣ, таъмини ҳаракати бемамониати шаҳрвандон бо истифода аз нархҳои дастрас, ташкили хатсайрҳои нав ва ба талаботи сатҳи байналмилалӣ мутобиқ намудани хизматрасониҳо гурӯҳи кории байниидоравӣ таъсис дод, иттилоъ доданд ба АМИТ «Ховар» дар Кумитаи рушди сайёҳии назди Ҳукумати ҷумҳурӣ.

Гурӯҳи корӣ аз 31 март то 1 апрели соли 2022 аз гузаргоҳҳои сарҳадии «Патар», «Фотеҳобод», «Сарбанд», «Ҳаштяк», «Саразм», «Фурудгоҳи байналмилалии Хуҷанд» ва истгоҳи «Роҳи оҳани Хуҷанд»- -и вилояти Суғд дидан карда, ба масъулин вобаста ба одоби муошират ва хизматрасонӣ ҳангоми вуруд ва хуруҷи сайёҳон, пешниҳоди иттилооти саҳеҳ вобаста ба буду бош дар кишвар дастуру тавсияҳои мушаххас дод.

Гурӯҳи кории байниидоравӣ фаъолияти худро дар муосиргардонии нуқтаҳои қабули сайёҳон, хизматрасонии дуруст ба сайёҳони дохиливу хориҷӣ, аз ҷумла дар фурудгоҳҳои дорои аҳамияти байналмилалию маҳаллӣ ва гузаргоҳҳои сарҳади давлатӣ пеш мебарад.

Гурӯҳи кории байниидоравӣ бо мақсади беҳтар намудани хизматрасонии сайёҳӣ ба дигар минтақаҳои ҷумҳурӣ низ сафарбар карда мешавад.

АКС: Кумитаи рушди сайёҳии назди Ҳукумати ҶТ