ТАСС: Президенти Тоҷикистон радикализми диниро хатари ҷиддӣ барои минтақа номиданд
ДУШАНБЕ, 21.07.2022 /АМИТ «Ховар»/. Таҳмили идеологияи радикализми динӣ дар кишварҳои Осиёи Марказӣ хатари ҷиддист. Дар ин бора Президенти Ҷумҳурии Тоҷикистон Эмомалӣ Раҳмон имрӯз зимни Вохӯрии чоруми машваратии сарони давлатҳои Осиёи Марказӣ, ки 21 июл дар шаҳри Чолпон-Отаи Қирғизистон баргузор гардид, изҳори назар намуданд, хабар медиҳад ТАСС.
Дар бораи радикализм
«Таҳмили идеологияи ниҳоят харобиовари радикализми динӣ дар Осиёи Марказӣ мушкилоти ҷиддӣ мебошад. Хавфноктарин барои ҷомеаи мо тамоюли таҳкими мавқеи салафия ва ваҳҳобия аст», — таъкид доштанд Президенти Тоҷикистон.
Дар бораи нақшаҳои ноором сохтани вазъи минтақа
Эмомалӣ Раҳмон гуфтанд, ки неруҳои мухталиф тарҳрезӣ кардани ноором сохтани вазъ дар минтақаи Осиёи Марказиро идома медиҳанд.
«Рӯйдодҳои ахири кишварҳои мо гувоҳӣ медиҳанд, ки неруҳои мухталиф то ҳол нақшаҳои ноором сохтани суботи минтақаро дар сар доранд», — гуфтанд Президенти Тоҷикистон.
Ба гуфти Сарвари давлат, ин ҳодисаҳо нишон доданд, ки неруҳои муайян, аз ҷумла тавассути шабакаҳои иҷтимоӣ кӯшиш доранд, ки шаҳрвандонро ба тазоҳуроти эътирозӣ таҳрик диҳанд.
Дар бораи «Толибон»*
Эмомалӣ Раҳмон ҳамчунин зикр намуданд, ки «Толибон»* барои мутмаин сохтани ҷомеаи ҷаҳонӣ ба қонунияти ҳокимияташон дар Афғонистон ягон тадбир наандешиданд.
«Тайи давраи гузашта роҳбарияти ҳаракати «Толибон»* тадбири воқеие наандешид, то ҷомеаи ҷаҳонӣ ва аҳолии Афғонистонро ба қонунӣ будани ҳокимияташон, доштани қобилияти назорати вазъ дар мамлакат, таъмини амнияти шаҳрвандони худ, ҳалли масоили иҷтимоӣ-иқтисодии бамиёномада мутмаин созанд», — иброз доштанд Эмомалӣ Раҳмон.
Роҳбарияти «Толибон»* дар Афғонистон сиёсати таҷовузкоронаи поймолкунандаи ҳуқуқи гурӯҳҳои гуногуни этникиро ба роҳ мондааст, изҳор намуданд Президенти Тоҷикистон.
«Толибон сиёсати табъизи таҷовузкорона бар зидди гурӯҳҳои мухталифи этникӣ ва консерватизми сахти мазҳабиро пеш мебаранд», — гуфтанд Эмомалӣ Раҳмон.
Президенти Тоҷикистон инчунин таваҷҷуҳи ҳозиринро ба изҳороти чанде қабли роҳбарияти «Толибон»* дар бораи дар мамлакат бекор кардани тамоми санадҳои қонунгузорӣ ва нияти дар тамоми соҳаҳои ҳаёти ҷамъиятии афғонҳо ба таври умумӣ ҷорӣ кардани қонунҳои шариат ҷалб намуданд.
Дар Вохӯрии чоруми машваратии сарони давлатҳои Осиёи Марказӣ Президенти Ҷумҳурии Тоҷикистон Эмомалӣ Раҳмон, Президенти Ҷумҳурии Қазоқистон Қосим–Жомарт Токаев, Президенти Ҷумҳурии Қирғизистон Садир Жапаров, Президенти Ҷумҳурии Узбекистон Шавкат Мирзиёев ва Президенти Туркманистон Сердар Бердимуҳамедов иштирок карданд.
________
* Ҳаракати дар Тоҷикистон ва соири кишварҳо мамнӯъ
АКС: Хадамоти матбуоти Президенти ҶТ/АМИТ «Ховар»
Дар Душанбе ҷаласаи ҳамоҳангсозии сохторҳои қудратӣ ва мақомоти ҳифзи ҳуқуқ доир гардид
Таваҷҷуҳ! Насби таҷҳизоти махсуси рӯшноӣ ва садо дар мошинҳои шахсӣ хилофи қонун аст
Дар панҷ соли охир музди меҳнати амалкунандаи кормандони мақомоти ҳифзи ҳуқуқ дар Тоҷикистон 100 фоиз зиёд карда шуд
Дар Қувваҳои мусаллаҳи Тоҷикистон даври якуми таҳсил оғоз гардид
Дар Раёсати Вазорати корҳои дохилӣ дар вилояти Суғд доир ба ҳифзи ҳуқуқу манфиатҳои ноболиғон ҳамоиш доир шуд
Вазорати корҳои дохилӣ: «Ҳеҷ гоҳ корти бонкӣ ё маълумоти онро ба шахсони сеюм надиҳед»
Дар Палатаи ҳисоб оид ба сиёсати ҳуқуқии давлат дар самти пешгирӣ ва муқовимат ба экстремизм ва терроризм машварат доир шуд
Ҷаласаи Комиссия оид ба ҳолатҳои фавқулода ва мудофиаи граждании ноҳияи Шаҳринав баргузор шуд
Прокуратураи генералӣ: «Дар робита ба кушторҳои дар шаҳри Конибодом рухдода гумонбарон дастгир гардиданд»
Дар Вазорати мудофиаи Тоҷикистон оид ба ҷамъбасти даъвати тирамоҳӣ ҷаласа баргузор гардид
1500 нафар ҷавонони синни даъватии вилояти Суғд даври омӯзишии ронандагиро хатм намуданд
Дар шаҳри Бодканд вохӯрии гурӯҳҳои кории ҳайатҳои ҳукуматии Тоҷикистон ва Қирғизистон баргузор шуд
