Агентии хизмати давлатӣ: дар 101 ҷамоати шаҳраку деҳот ягон нафар зан дар мансабҳои роҳбарикунанда фаъолият надорад

ДУШАНБЕ, 02.08.2022 /АМИТ «Ховар»/. Дар 101 ҷамоати шаҳраку деҳоти мавриди санҷиш қароргирифта ягон нафар зан дар мансабҳои роҳбарикунанда фаъолият надошта, талаботи банди 2 Фармони Президенти Ҷумҳурии Тоҷикистон аз 3 декабри соли 1999 «Дар бораи тадбирҳои баланд бардоштани мақоми зан дар ҷомеа», яъне дар яке аз вазифаҳои роҳбарикунандаи ҷамоатҳо фаъолият намудани занон таъмин нагардидааст. Ин матлабро имрӯз зимни нишасти матбуотии Агентии хизмати давлатии назди Президенти Ҷумҳурии Тоҷикистон директори ин ниҳод Ҷумъа Давлатов ба хабарнигорон иброз намуд.

Мавсуф гуфт, ки тибқи таҳлилҳои Агентии хизмати давлатии назди Президенти Ҷумҳурии Тоҷикистон, дар 348 ҷамоати шаҳрак ва деҳот 2817 воҳиди корӣ мавҷуд аст, ки дар он 2016 нафар хизматчиёни давлатӣ фаъолият доранд. Аз ин шумора 352 нафар ё 17,5 фоизро занон ташкил медиҳанд, ки нисбат ба ҳисоби миёнаи ҷумҳуриявӣ 6,4 банди фоизӣ кам мебошад.

«Дар ҷамоатҳои шаҳраку деҳоти «Чоруқдаррон», «Зарнисор» ва «Навгарзан»-и шаҳри Гулистон, «Ворух», «Нефтобод», «Зумрад»-и шаҳри Исфара, «Зарзамин»-и ноҳияи Бобоҷон Ғафуров, «Шамтуч»-и ноҳияи Айнӣ, «Панҷ»-и ноҳияи Панҷ, «Фирўза», «Истиқлол»-и ноҳияи Носири Хусрав, «Урта Назаров», «Носири Хусрав»-и ноҳияи Қубодиён, «Қадриддин Ғиёсов», «Ифтихор» ва «50-солагии Тоҷикистон»-и ноҳияи Абдураҳмони Ҷомӣ, «Машъал»-и ноҳияи Вахш, «Обикиик»-и ноҳияи Хуросон, «Деҳқонобод»-и ноҳияи Фархор, «Файзобод», «Вашгирд»-и ноҳияи Файзобод, «Регар»-и шаҳри Турсунзода, «Лучоб», «Зидеҳ»-и ноҳияи Варзоб, «Навобод», «Нусратулло Махсум», «Ҷафр», «Оби меҳнат», «Ясман», «Қалъаи Сурх»-и ноҳияи Рашт, «Дарбанд»-и ноҳияи Нуробод, «Пилдон», «Сартало», «Лахш»-и ноҳияи Лахш, «Тавилдара», «Ваҳдат», «Заршўён»-и ноҳияи Сангвор, «Ширинчашма»-и ноҳияи Тоҷикобод дар давраи санҷиш ҷавонони то 35-сола фаъолият надоштанд»,- гуфт ӯ.

Ҳамчунин дар нишасти матбуотӣ зикр шуд, ки то 1 июли соли равон шумораи хизматчиёни давлатии шаҳрвандӣ 18576 нафар, теъдоди занҳо 4438 нафар ё 23,9 фоиз, теъдоди ҷавонони то 35-сола 8897 нафар ё 47,9 фоиз, синни миёнаи хизматчии давлатӣ 37,1 солро ташкил медиҳад.

Зимни нишасти матбуотӣ ҳамчунин таъкид гардид, ки Агентии хизмати давлатӣ оид ба масъалаҳои вазъи ҷалби занон ба хизмати давлатӣ, мусоидат ба фарогирии бештари бонувон ба хизмати давлатӣ ва мансабҳои роҳбарикунандаи он мунтазам тадбирҳои мушаххас меандешад. Зеро дар баъзе вазорату идораҳо, мақомоти иҷроияи ҳокимияти давлатии шаҳру ноҳияҳо вобаста ба ҷалби занону духтарон ба хизмати давлатӣ тадбирҳои дахлдор андешида намешаванд.

Фирӯза ДАВЛАТЗОДА,
АМИТ «Ховар»

АКС: АМИТ «Ховар»