АГЕНТИИ ОБУҲАВОШИНОСӢ: Рӯзҳои наздик ҳарорати ҳаво дар Тоҷикистон 5-7 дараҷа паст фаромада, дар Бадахшон борон меборад

ДУШАНБЕ, 20.08.2022 /АМИТ «Ховар»/. Шурӯъ аз 21 август дар саросари ҷумҳурӣ пастшавии ҳарорати ҳаво аз 5 то 7 дараҷа пешгӯӣ карда мешавад. Дар ин бора ба АМИТ «Ховар» муовини Директори Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон Ҷамила Байдуллоева хабар дод.

Ба иттилои Ҷамила Байдулоева, бо сабаби ҳаракати ҳавои муссонӣ ва таъсири он интизор меравад, ки дар Вилояти Мухтори Кӯҳистони Бадахшон рӯзҳои наздик борон борад.

Муовини Директори Агентии обуҳавошиносии кишвар зикр намуд, ки ҳаво рӯзҳои наздик дар водиҳо ва навоҳии тобеи марказ, шаҳри Душанбе то +30+-35 дараҷа ва баъдан то охири моҳ +35+37 дараҷа ва дар қисмати ҷанубии кишвар- вилояти Хатлон +38+39 дараҷа гарм шуда, вазиши чангу ғубор дар назар аст.

Имрӯз дар вилояти Суғд ҳаво тағйирёбандаи бебориш шуда, дар водиҳо шабона +18+23 дараҷа, рӯзона +31+36 дараҷа, дар ноҳияҳои кӯҳӣ шабона +7+12 дараҷа ва рӯзона +24+29 дараҷа гарм мешавад.

Дар вилояти Хатлон ҳавои камабри бебориш дар назар дошта шуда, дар водиҳо шабона +19+24 дараҷа, рӯзона +35+39 дараҷа, дар доманакӯҳҳо шабона +16+21 дараҷа ва рӯзона +32+37 дараҷа гарм мешавад.

Ҳаво дар ғарби Вилояти Мухтори Кӯҳистони Бадахшон шабона +15+20 дараҷа, рӯзона +26+31 дараҷа гарм, дар шарқи вилоят шабона +4+9 дараҷа ва рӯзона +16+21 дараҷа гарм мешавад.

Дар шаҳру навоҳии тобеи марказ ҳаво дар водиҳо шабона +17+22 дараҷа, рӯзона +33+39 дараҷа, дар ноҳияҳои кӯҳӣ шабона +11+16 дараҷа ва рӯзона 29+34 дараҷа гарм мешавад.

Дар Душанбе ҳавои камабри бебориш дар назар аст. Шамол аз самти шарқ бо суръати 4-9 метр, дар баъзе ҳолатҳо бо шиддати то 7-12 метр дар як сония вазида, ҳаво шабона +19+21 ва рӯзона +35+37 дараҷа гарм мешавад.

Тибқи иттилои обуҳавошиносони мамлакат, 20-21 август дар ноҳияҳои кӯҳӣ ва баландкӯҳи ҷумҳурӣ, ба истиснои минтақаҳои шарқии Вилояти Мухтори Кӯҳистони Бадахшон сар задани селҳои пиряхӣ аз эҳтимол дур нест.

Марзия САИДЗОДА,
АМИТ «Ховар»

АКС аз манбаъҳои боз