«TAJIKISTAN FASHION WEEK». Дар он куртаҳо аз матоъҳои абрешимӣ пешкаши дӯстдорони олами мӯд гардонида шуданд
ДУШАНБЕ, 18.11.2022 /АМИТ «Ховар»/. Дар фасли нуҳуми «TAJIKISTAN FASHION WEEK»- Ҳафтаи мӯди Тоҷикистон, ки дар пойтахти ҷумҳурӣ- шаҳри Душанбе аз 15 то 17 ноябр доир гардид, 22 нафар тарроҳон аз кишварҳои Тоҷикистон, Россия, Эрон, Қазоқистон ва Узбекистон ширкат намуда, беҳтарин намунаҳои либосҳоро пешкаши дӯсторони олами мӯд гардониданд, иттилоъ медиҳад хабарнигори АМИТ «Ховар».
Дар маросими ифтитоҳи ин Намоиши байналмилалии фарҳангию саноатӣ намояндагони вазорату идораҳои ҷумҳурӣ, тарроҳони кишварҳои хориҷӣ аз Россия, Эрон, Қазоқистон, Узбекистон ва ҳунармандону санъаткорон иштирок намуданд. Мавриди зикр аст, ки шурӯъ аз соли 2018 дар ҷумҳурӣ Ҳафтаи мӯди Тоҷикистон гузаронида мешавад ва имсол фасли нуҳуми он баргузор гардид.
Фасли нуҳуми Ҳафтаи мӯди Тоҷикистон ба атласу адрас ва матоъҳои абрешимӣ бахшида шуд. Тамоми либосҳое, ки дар Ҳафтаи мӯди Тоҷикистон намоиш дода шуданд, аз атласу адрас ва матоъҳои абрешимӣ омода гардидаанд.
Тавре сардори Раёсати саноати сабук ва пиллаи Вазорати саноат ва технологияҳои нави ҷумҳурӣ Малика Ёрбобоева мегӯяд, «фасли нуҳуми Ҳафтаи байналмилалии мӯд дар доираи Солҳои рушди саноат эълон гардидани солҳои 2022-2026 дар Ҷумҳурии Тоҷикистон бо ибтикори Иттиҳодияи эҷодии «Т&Z», дастгирии Вазорати саноат ва технологияҳои нави Ҷумҳурии Тоҷикистон гузаронида шуда, ҳадафаш муаррифии матоъҳои абрешимии тоҷик, хусусан атласу адрас мебошад. Истеҳсоли матоъҳои абрешимӣ фарҳанги қадимии халқи тоҷик маҳсуб шуда, бо таърихи Роҳи Бузурги Абрешим иртибот дорад. Намунаҳои матоъҳои абрешимӣ, ки дар қаламрави Тоҷикистон ёфт шудаанд, ба асрҳои II-III мелодӣ рост меоянд. Инчунин намунаҳои матоъҳои анъанавии халқи тоҷик дар осорхонаҳои машҳури олам, назири Осорхонаи Виктория ва Алберти Лондон, Эрмитажу Осорхонаи бостоншиносии шаҳри Санкт – Петербург ва Осорхонаи Метрополитени Амрико намоиш дода шудаанд».
Дар Ҳафтаи мӯди Тоҷикистон 22 нафар тарроҳон ва брендҳои машҳур ширкат намуданд, ки 16 нафарашон аз Тоҷикистон буда, коллексияҳои нави худро пешниҳоди дӯстдорони олами мӯд намуданд. Инчунин дар доираи ин Намоиши байналмилалии фарҳангию саноатӣ 27 нафар донишҷӯёни беҳтарини риштаи тарроҳии Донишгоҳи технологии Тоҷикистон, Донишкадаи давлатии санъати тасвирӣ ва дизайни Тоҷикистон маҳсули дастони худро ба маъраз гузоштанд. Ҳамзамон машварати корӣ бо тарроҳон ва истеҳсолкунандагони саноати сабуки ватанӣ доир гардид, ки дар он масъалаҳои вобаста ба тақвияти ҳамкорӣ ва дурнамои рушди соҳа баррасӣ гардиданд.
Марзия САИДЗОДА,
АМИТ «Ховар»
АКС: АМИТ «Ховар» ва манбаъҳои боз
Ҳайати ҳунарии Театри давлатии академии опера ва балет дар Операи Рим ҳунарнамоӣ менамояд
ҲУКУМАТИ ЭЛЕКТРОНӢ. Дар Китобхонаи миллии Тоҷикистон беш аз 3 миллион нусхаи чопӣ нигоҳдорӣ мешавад
РУШДИ ҲУНАРҲОИ МАРДУМӢ. Дар Тоҷикистон сабадбофӣ бо шакли муосир рушд меёбад
Дар Ҷумҳурии Тоҷикистон Рӯзҳои фарҳанги Ҷумҳурии Мардумии Чин баргузор мегарданд
Оид ба муоширати бисёрфарҳангӣ, нақши забонҳо, адабиёт ва илм дар рушди ҷомеаи муосир конфронси байналмилалӣ доир шуд
Намояндаи Тоҷикистон дар Анқара дастовардҳои китобдорӣ ва рақамикунонии Тоҷикистонро муаррифӣ намуд
«ТОҶИКИСТОН». Таҳти чунин унвон дар Ҷумҳурии Арабии Миср маҷалла бо забони арабӣ нашр гардид
Китоби «Забони миллат – ҳастии миллат» бо 7 забон тарҷума ва нашр гардид
Дар шаҳри Дюсселдорф барномаи фарҳангии тоҷикон баргузор гардид
Дар Донишкадаи санъати театрии Русия намоиши театрии «Ҷавонии Мушфиқӣ» баргузор шуд
Дар Тоҷикистон Анҷумани сеюми забоншиносони давлатҳои ҳамзабону ҳамфарҳанг баргузор мегардад
Дар Китобхонаи миллии Тоҷикистон оид ба нақши оила дар камолоти маънавии фарзанд ҳамоиш доир шуд
