Имрӯз ҷаласаи навбатии Шӯрои намояндагони доимии ИДМ баргузор мешавад

ДУШАНБЕ, 20.12.2022 /АМИТ «Ховар»/. Имрӯз, 20 декабр дар Кумитаи иҷроияи ИДМ дар Минск ҷаласаи навбатии Шӯрои намояндагони доимии кишварҳои узви ИДМ дар назди мақомоти оинномавӣ ва дигар ниҳоди Иттиҳод баргузор мешавад. Дар ин бора ба АМИТ «Ховар» дар маркази матбуоти Кумитаи иҷроияи ИДМ хабар доданд.

Дар ҷаласа раиси Кумитаи иҷроия – котиби иҷроияи ИДМ Сергей Лебедев иштирок мекунад.

Дар лоиҳаи рӯзномаи ҷаласа ҳафт масъала гузошта шудааст. Муҳимтарини он- ҷамъбасти натиҷаҳои раёсати Ҷумҳурии Қазоқистон дар Иттиҳоди Давлатҳои Мустақил дар соли 2022 мебошад. Доир ба ин масъала намояндаи доимии Ҷумҳурии Қазоқистон дар мақомоти оинномавӣ ва дигар ниҳоди ИДМ, Сафири Фавқулода ва Мухтори Қазоқистон дар Беларус Аскар Бейсенбоев маълумот медиҳад.

Намояндагони доимии кишварҳои ИДМ масъалаи фиристодани ҳайатҳои варзиширо барои ширкат дар Бозиҳои II кишварҳои ИДМ баррасӣ хоҳанд кард. Мусобиқаҳо дар Беларус аз 3 то 15 августи соли 2023 аз рӯи 20 намуди варзиш баргузор мешаванд. Шумораи пешбинишудаи иштирокчиёни бозиҳо – варзишгарон, мураббиён, доварон, кормандони соҳаи тиб ва шахсони дигар ҳудуди 3 ҳазор нафарро ташкил медиҳад. Баргузории мусобиқаҳо дар шаҳрҳои Минск, Борисов, Солигорск, Молодечно, Брест, Орша, Жлобин, Гродно, Могилев дар назар аст.

Аъзои Шӯрои намояндагони доимӣ фаъолияти имсолаи худро ҷамъбаст намуда, нақшаҳои кориро барои соли оянда бо дарназардошти вазифаҳои афзалиятноки рушди ИДМ муайян мекунанд.

Ба ғайр аз ин дар ҷаласа баррасии ҷараёни иҷрои Нақшаи тадбирҳои асосии татбиқи Консепсияи рушди минбаъдаи ИДМ ва пешниҳодҳо оид ба лоиҳаи рӯзномаи ҷаласаи навбатии Шӯрои вазирони корҳои хориҷии Иттиҳод дар назар аст.

ДАР АКС: Сафири Фавкулода ва Мухтори Ҷумҳурии Тоҷикистон дар Беларус, Намояндаи доимии Ҷумҳурии Тоҷикистон дар мақомоти оинномавӣ ва дигар ниҳоди Иттиҳоди Давлатҳои Мустақил Маҳмадшариф Ҳақдод. Акси хадамоти матбуоти Кумитаи иҷроияи ИДМ