НУҚТАИ САЙЁРИ МИЛИТСИЯ. Дар Суғд барои рушди ҳамкории милитсия ва ҷомеа чунин навгонӣ ба роҳ монда шуд

Декабрь 1, 2022 09:51

ДУШАНБЕ, 01.12.2022 /АМИТ «Ховар»/. Фаъолияти Нуқтаи сайёри милитсия аз навгониҳои хизматии милитсия ба аҳолист, ки дар доираи Барномаи давлатии ислоҳоти милитсия барои солҳои 2021-2025 роҳандозӣ ва дар ҳамаи минтақаҳои Тоҷикистон мавриди амалу истифода қарор гирифтааст. Мавриди зикр аст, ки Нуқтаи сайёри милитсия микроавтобуси махсуси хизматии тамғаи «Газел-Некст»- ҳуҷраи кориест, ки барои шунидани арзу шикоят, таклифу пешниҳод ва дархостҳои аҳолӣ пешбинӣ шудааст. Дар ин бора ба АМИТ «Ховар» сухангӯи Раёсати Вазорати корҳои дохилӣ дар вилояти Суғд Акбар Шарифӣ хабар дод.

Мавсуф иброз дошт, ки мақомоти корҳои дохилии вилояти Суғд 2 адад чунин микроавтобуси хизматиро дар ихтиёр дорад. Аниқтараш, 1 адад воситаи нақлиёти мазкур дар тавозуни шуъбаи ҳифзи тартиботи ҷамъиятии дастгоҳи Раёсат буда, нақлиёти дуюм ба шуъбаи-1 ВКД дар шаҳри Исфара вобаста шудааст.

Чанде қабл ҳайати гурӯҳи кории Нуқтаи сайёри милитсияи Шуъбаи ҳифзи тартиботи ҷамъиятӣ (ШҲТҶ) Раёсати ВКД дар вилояти Суғд ба маҳаллаи Чашмаи арзанаи шаҳри Хуҷанд, ки аз маркази шаҳр дур ҷойгир аст, сафар намуд.

Зимни вохӯрӣ бо аҳолӣ ва ҳисоботи нозири минтақавӣ ҳамоҳангсози миллӣ оид ба ислоҳоти милитсия, полковники милитсия Валихон Ҳамдамзода, сардори ШҲТҶ Раёсати ВКД дар вилояти Суғд полковники милитсия Рамзӣ Шосулаймонзода сухан гуфтанд.

Дар баробари муаррифии ҳайати гурӯҳи корӣ самтҳои фаъолият ва мақсади Нуқтаи сайёри милитсияро ба аҳолӣ фаҳмониданд. Ҳамчунин нозири минтақавии милитсия Хушвахт Ҷангиев ба сокинон оид ба вазъи ҷиноятии минтақа ҳисобот дод.

Дар ҷараёни мулоқот сокинони маҳаллаи Чашмаи арзана ба ҳайати корӣ вобаста ба ҳифзи тартиботи ҷамъиятӣ таклифу пешниҳодҳо карданд.

Дар идома аз имконияти Нуқтаи сайёри милитсия шаҳрвандон дидан намуда, арзу муроҷиати онҳо қабул гардид.

Ҳамин гуна мулоқот бо сокинони маҳаллаҳои 3 ва 8-уми шаҳри Хуҷанд низ гузаронида шуд.

Дар Муассисаи давлатии таълимӣ барои хонандагони болаёқати шаҳри Хуҷанд, воқеъ дар маҳаллаи 8 вохӯрии ҳисоботии нозири минтақавӣ, лейтенанти калони милитсия Шодрӯз Шаропов доир гардида, иштирокчиён аз ҳолати воқеии ҷиноятии маҳалли зист дар давраи 10 моҳи имсол огоҳӣ ёфтанд. Маърузаи ҳисоботии нозири минтақавӣ фарогири вазъи ҷинояткорӣ, корбарӣ ҷиҳати ҳифзи тартиботи ҷамъиятӣ ва дигар масъалаҳои самтӣ буд.

Дар ду минтақаи сафарбаргардидаи Нуқтаи сайёри милитсия ба шаҳри Хуҷанд, ки дар ҳар кадоме сесоатӣ идома кард, гурӯҳи корӣ 5 муроҷиат ва 11 таклифу пешниҳоди аҳолиро ба қайд гирифт.
Ҳафтаи гузашта дар маркази Ҷамоати деҳоти Чилгазии шаҳри Исфара низ Нуқтаи сайёри милитсия ба аҳолӣ хизмат расонид. Чорабинии хизматӣ бо иштироки намояндагони ВКД баргузор гашт. Ба аҳолӣ мақсаду мароми роҳандозӣ шудани Нуқтаи сайёрӣ милитсия фаҳмонида шуд, ки ҳадафи он хизматрасонӣ дар ҷойҳо ба аҳолӣ, наздиксозии алоқаи мақомоти милитсия бо сокинон ва дар ин замина рушди ҳамкории милитсия ва ҷомеа мебошад.
Дар ҷараёни мулоқот нозири минтақавӣ ба аҳолӣ ҳисобот дода, таклифу пешниҳодҳои онҳо шунида шуд.

Нуқтаи сайёри милитсия имконият фароҳам овард, ки сокинони Ҷамоати деҳоти Чилгазии шаҳри Исфара мушкилоти алоқаманд ба фаъолияти милитсияро дар ҷойи зисти худ ҳал намоянд.
Аз ин баъд аз рӯи нақша ҳафтае як маротиба ҳайати кории нуқтаҳои сайёри милитсия ба минтақаҳои дур аз маркази шаҳру ноҳияҳо сафарбар шуда, ба аҳолӣ хизмат мерасонад.

АКС: РВКД дар вилояти Суғд

Декабрь 1, 2022 09:51

Хабарҳои дигари ин бахш

Дар Тоҷикистон шумораи нашъамандон нисбат ба солҳои қаблӣ коҳиш ёфт
Дар Душанбе маросими ҷоизасупорӣ ва ҳавасмандгардонии варзишгарони Вазорати мудофиа доир гардид
НИШАСТИ МАТБУОТӢ. Дар Тоҷикистон таъсири сардиҳо ба хоҷагии қишлоқ, маҳсулоти кишоварзӣ ва чорводорӣ бе асар намонд
Барои риоя накардани қоидаҳои бехатарии саноатӣ шахсони масъул беш аз 1 миллион сомонӣ ҷарима баста шуданд
Дар пойгоҳи Донишкадаи ҳарбӣ масъалаи рушди илми низомӣ баррасӣ карда шуд
БЕМАСЪУЛИЯТИИ ВОЛИДАЙН. Дар Душанбе давоми чор сол аз ноболиғону наврасон шумораи зиёди силоҳи сард мусодира гардид
Сарбозони шаҳри Бӯстон ҳамсолони худро ба ҳимояи марзҳои муқаддаси Ватан даъват намуданд
Дар Ҳисор озмуни «Ватанпарвар» доир карда мешавад
«МУҚОВИМАТ БА САВДОИ ОДАМОН: МУШКИЛОТ ВА МУЛОҲИЗАҲО». Дар Хоруғ таҳти ин унвон ҳамоиш доир шуд
ЭҲТИЁТ БОШЕД, ШАКЛИ НАВИ ДУЗДӢ! Дар Душанбе ҷавондухтареро барои тасарруфи маблағҳо аз ҳамёни электронӣ дастгир намуданд
Дар Хатлон барои наваскарон бурсҳои ройгон ташкил гардиданд
Дар роҳҳои мошингарди минтақаҳои кӯҳии Тоҷикистон хатари лағзиши тарма боқӣ мемонад