Роналду муддаии асосиро барои пирӯзӣ дар ЧҶ-2022 дар Қатар ном бурд

ДУШАНБЕ, 13.12.2022 /АМИТ «Ховар»/. Ҳамлагари дастаи мунтахаби Португалия Криштиану Роналду дар бораи муддаии асосии Чемпионати ҷаҳон-2022 дар Қатар ибрози назар кард, хабар медиҳад АМИТ «Ховар» бо истинод ба «Спорт-Экспресс».

«Фикр мекунам, ки Фаронса ҳоло муддаии асосии пирӯзист, чунонки пеш аз оғози мусобиқот гуфта будам. Ва ман инчунин фикр мекунам, ки Мбаппе беҳтарин бозигари ин чемпионати ҷаҳон хоҳад буд», — иқтибос меорад Mirror аз суханҳои Роналду.

Ҳамчунин футболбози португалӣ дар бораи ноком шудани дастаи мунтахаби Англия дар ЧҶ-2022 ҳарф зад.

«Фаромӯш накунед, ки Англия дар бозӣ бар зидди Фаронса футболи хеле хуб нишон дод. Ман фикр мекунам, ки бо онҳо ҳамон чизе рӯй дод, ки Бразилия аз сар гузаронид. Англия хеле хуб бозӣ кард, аммо дар ниҳоят ҳама чиз ба ҷузъиёти хурд бурда расонид, ки оқибат ба натиҷаи бозӣ таъсир расониданд. Аммо англисҳо бояд аз он фахр кунанд, ки онҳо дар чемпионати ҷаҳон чӣ гуна бозӣ кардаанд», — илова кард ҳамлагар.

Тавре АМИТ «Ховар» қаблан хабар дода буд, дар даври нимфинали Чемпионати ҷаҳон-2022 оид ба футбол дастаҳои мунтахаби миллии Аргентина ва Хорватия 13 декабр ва рӯзи дигар Фаронса бо Марокаш бозӣ мекунанд. Ҳарду бозӣ соати 23.59 ба вақти Душанбе баргузор мешаванд. Шумо метавонед бозиҳоро мустақиман аз шабакаҳои телевизионии варзишии Тоҷикистон- «Варзиш» ва «Футбол» тамошо кунед.

АКС: Reuters