40 нафар шахсони масъул барои ғайриқонунӣ дахолат кардан ба фаъолияти соҳибкорон ба ҷавобгарӣ кашида шуданд

ДУШАНБЕ, 18.02.2023. /АМИТ «Ховар»/. Прокуратураи генералии Ҷумҳурии Тоҷикистон соли сипаригардида 40 нафар шахсони масъулро барои дахолати ғайриқонунӣ ба фаъолияти соҳибкорон ба ҷавобгарӣ кашид. Дар ин хусус дирӯз зимни нишасти матбуотии Прокуратураи генералӣ ба хабарнигорон иттилоъ дода шуд.

Иттилоъ дода шуд, ки қабули Фармони Президенти Ҷумҳурии Тоҷикистон муҳтарам Эмомалӣ Раҳмон «Дар бораи эълон намудани мораторий ба ҳама намуди санҷишҳои фаъолияти субъектҳои соҳибкорӣ» ба беҳтар шудани фазои соҳибкорӣ дар мамлакат мусоидат намуд. Дар раванди риояи фармони мазкур аз ҷониби прокуророн 114 ҳолати гузаронидани санҷишҳои ғайриқонунӣ, дахолат ба фаъолияти соҳибкорон, беасос ба ҷавобгарии маъмурӣ кашидан ошкор ва барои роҳ додан ба чунин камбудиҳо 40 нафар шахсони масъул ба ҷавобгарӣ кашида шуданд.

Ҳамзамон дар нишасти матбуотӣ иброз дошта шуд, ки зимни бунёди биноҳои баландошёна аз ҷониби баъзе ширкатҳои сохтмонӣ ҳолатҳои поймол намудани ҳуқуқҳои ҳиссагузорон муайян карда шуда, зарари ба онҳо расонидашуда барқарор гардид.

Шаҳлои САДРИДДИН,
АМИТ «Ховар»

АКС: АМИТ «Ховар»