CУТ ба муттаҳид кардани кӯшишҳо барои таъмини фаромарзии кумакрасонии башардӯстона байни Туркия ва Сурия даъват кард
ДУШАНБЕ, 15.02.2023 /АМИТ «Ховар»/. Созмони умумиҷаҳонии тандурустӣ (СУТ) аз ҳукуматҳо ва ҷомеаи шаҳрвандӣ даъват ба амал овард, ки барои таъмини фаромарзии кумакрасонии башардӯстона байни Туркия ва Сурия, инчунин дар дохили Сурия якҷоя кор кунанд. Дар ин хусус АМИТ «Ховар» бо истинод ба «Синхуа» иттилоъ додааст.
Директори дафтари минтақавии Созмони умумиҷаҳонии тандурустӣ дар Аврупо Ҳанс Клуге ин заминларзаро бадтарин офати табиӣ дар минтақа дар садсолаи охир арзёбӣ намуда, муҳимияти ҳамкорӣ дар расонидани кумакро таъкид кард.
«Талабот бузург буда, ҳар соат калон афзоиш меёбанд. Тақрибан 26 миллион аҳолии ду давлат ба кумаки башардӯстона ниёз доранд»,-гуфт ӯ рӯзи сешанбе дар нишасти матбуотӣ.
Xанс Клуге таъкид кард, ки Туркия талафоти фалокатоварро аз сар гузаронид. Дар натиҷаи заминларза дар кишвар беш аз 31 ҳазор нафар ҳалок ва 100 ҳазор нафар маҷрӯҳ шуданд. Ҳазорон нафар манзилҳои худро аз даст доданд ва дар айни замон одамон дар паноҳгоҳҳои муваққатӣ зиндагӣ мекунанд.
Дар минтақаи сарҳадии шимолу ғарбии Сурия тақрибан 5 ҳазор нафар ба ҳалокат расидаанд ва интизор меравад, ки ин рақам афзоиш ёбад.
Созмони умумиҷаҳонии тандурустӣ инчунин ишора намуд, ки нигарониҳо оид ба хатарҳо ба саломатӣ вобаста ба ҳавои сард, пешгирӣ ва паҳншавии бемориҳои сироятӣ зиёд мегарданд. Ҳамзамон беморхонаҳои Туркия бо сабаби воридшавии маризон таҳти фишори шадид қарор доранд — пас аз заминларзаи шадид 80 ҳазор нафар дар беморхонаҳо бистарӣ шудаанд.
Созмони умумиҷаҳонии тандурустӣ қаблан даъват карда буд, ки барои кумак дар рафъи оқибатҳои заминларза 43 миллион доллар ҷудо карда шавад. Ҳанс Клуге баён дошт, ки ин миқдор маблағ метавонад дучанд шавад.
Ба гуфтаи ӯ, ин маблағҳо барои таъмин намудани одамони аз ҳама осебпазир бо кумаки шикастабандӣ, дорувориҳои зарурӣ, дастгирии равоншиносӣ ва равоншиносии иҷтимоӣ, инчунин таъмини бонизоми одамон бо хизматрасонии тиббӣ истифода бурда мешаванд.
Азиза ДАДАБОЕВА,
АМИТ «Ховар»
АКС аз манбаъҳои боз
Палатаи поёнии парлумони Беларус дар ҳайати пурра интихоб гардид
Қатар барои шаҳрвандони Тоҷикистон раводидро бекор намуд
Прабово Субианто дар интихоботи президенти Индонезия пирӯз гардид
Директори генералии Созмони ҷаҳонии тандурустӣ Тедрос Аданом Гебрейесус изҳор намуд, ки ҷаҳон ба пандемияи нав омода нест
Александр Стубб дар интихоботи президентии Финландия пирӯз шуд
Дар интихоботи президентии Озарбойҷон Илҳом Алиев бо гирифтани 92,05% овози интихобкунандагон пешсаф мебошад
Теъдоди ҳалокшудагон бар асари сӯхтори ҷангал дар Чили ба 131 нафар расид
Имрӯз дар Озарбойҷон интихоботи ғайринавбатии президентӣ баргузор мешавад
Олжас Бектенов сарвазири нави Қазоқистон таъйин шуд
Дар Озарбойҷон пеш аз баргузории интихоботи президентӣ рӯзи хомӯшӣ эълон гардидааст
Бо сабаби барфи зиёд дар минтақаи Токио 1,8 ҳазор манзил бе барқ мемонанд
ТУРКИЯ ФАЛОКАТИ АСРРО БА ҲАМРАЪЙИИ АСР ТАБДИЛ ДОД. Имрӯз аз заминларзаи шадиди Туркия як сол сипарӣ гардид
