«ҶОМИ РУШД-2023». Дастаи мунтахаби наврасони Тоҷикистон (U-17) сазовори медали биринҷӣ гардид

ДУШАНБЕ, 13.02.2023. /АМИТ «Ховар»/. Дастаи наврасони Тоҷикистон (U-17) таҳти роҳбарии Раҳматулло Фузайлов барандаи медали биринҷии Мусобиқаи байналмилалии «Ҷоми рушд-2023» дар Минск гардид. Дар ин хусус ба АМИТ «Ховар» дар Федератсияи футболи Тоҷикистон хабар доданд.

Дастаи наврасони Тоҷикистон дар бозӣ барои ҷойи сеюм бар тими наврасони Русия бо ҳисоби калон- 3:0 пирӯз шуд. Голҳоро ба дарвозаи ҳариф  Абубакр Сулаймонов, Ориёнмеҳри Нуриддин ва Масрур Ғафуров  заданд.

Ба ин тартиб, дастаи мунтахаби наврасони Тоҷикистон (U-17) бидуни бохт «Ҷоми рушд-2023»-ро ҷамъбаст карда, бозиро  бо тимҳои миллии Русия (1:1) ва Беларус (2:2) мусовӣ намуда, бар дастаи Эрон (3:1) пирӯз шуданд.

Бозӣ барои ҷойи сеюм

ТОҶИКИСТОН (U-17) – Русия (U-16) – 3:0

Голҳо: Абубакр Сулаймонов, 42 (1:0). Ориёнмеҳри Нуриддин, 72 (2:0). Масрур Ғафуров, 79 (3:0).

АКС: Федератсияи футболи Тоҷикисон