Дар 5 соли охир 51 духтар аз Данғара тибқи квотаи Президентӣ соҳиби маълумоти олӣ ва касбу ҳунар гардид
ДУШАНБЕ, 07.03.2023 /АМИТ «Ховар»/. Дар 5 соли охир 51 духтар аз ноҳияи Данғара тибқи квотаи Президентӣ соҳиби маълумоти олӣ ва касбу ҳунар гардид. Дар ин хусус Раиси ноҳияи Данғара Исломиддин Хайриддин зимни ҳамоиши идона, ки ба Рўзи Модар бахшида шуд, маълумот дод, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии ноҳияи мазкур.
Тазаккур дода шуд, ки дар Тоҷикистон хурду бузург заҳмату фидокориҳои занону модаронро қадр мекунанд, зеро бонувон имрӯз бо нангу номуси ватандорӣ дар соҳаҳои гуногун баробари мардон фаъолият доранд.
«Баландгардии мақому манзалати занону духтарони тоҷик дар баробари дастгириҳои Ҳукумати мамлакат, махсусан Пешвои миллат муҳтарам Эмомалӣ Раҳмон, ҳамчунин аз саҳми бисёр арзишмандашон дар пешрафти ҷомеа ва натиҷаи заҳмати софдилонаашон мебошад. Занону модарони мо ҳанӯз дар оғози даврони Истиқлолияти давлатӣ ба хотири ҳифзи ҳуқуқу озодиҳои худ ва ба эътидол овардани вазъи ҷумҳурӣ азму талош карда, дар роҳи расидан ба сулҳу субот ва ваҳдати миллӣ саҳми намоён гузоштанд», — гуфта шуд дар ҳамоиш.
Иттилоъ дода шуд, ки дар ноҳия занону духтарони лаёқатманд ва кордону ташаббускор ба хизмати давлатӣ торафт бештар ҷалб мегарданд.
«Ба ҳолати аввали моҳи марти соли 2023 аз шумораи умумии 87217 нафар занон дар ноҳия 12 нафар хизматчиёни давлатӣ ва 200 нафари онҳо имрӯз дар вазифаҳои роҳбарикунанда кор мекунанд. Саҳми занони фаъоли ноҳия дар тарбияи насли наврас ва ободонии диёр назаррас арзёбӣ мешавад», — иброз гардид дар ҷамъомад.
Гуфта шуд, ки занону духтарон иқдоми «Солҳои рушди деҳот, сайёҳӣ ва ҳунарҳои мардумӣ»-ро дастгирӣ карда, бо эҳёи касбу ҳунарҳои қадима дар тамоми қаламрави мамлакатю аз ҷумла дар ноҳияи Данғара низ марказҳои ҳунармандӣ ташкил менамоянд.
Беш аз 1138 нафар занону духтарони ноҳияи Данғара касби бошарафи омӯзгориро ба уҳда дошта, дар таълиму тарбияи насли ояндасози ноҳияамон нақши арзанда мегузоранд.
Тазаккур дода шуд, ки аз таъсис додани квотаҳои Президентӣ дар панҷ соли охир, яъне аз соли 2018 то соли хониши 2022 51 нафар духтарон аз Данғара бо истифода аз ин имтиёз ба мактабҳои олӣ дохил шуда, соҳиби маълумоти олӣ ва касбу ҳунар гардидаанд ва ҳоло дар соҳаҳои мухталифи иқтисодии миллӣ муваффақона фаъолият доранд.
АКС аз бойгонӣ
Рухшона Аловиддинзода барандаи Намоишгоҳи байналмилалии «Korea Institute of Patent Information» гардид
Барои сохтмони кампуси Донишкадаи байналмилалии Данғара лоиҳаи Бонки Исломии рушд амалӣ карда мешавад
Байни Маркази барномаҳои байналмилалӣ ва Муассисаи таълимии байналмилалии «Оксфорд» Созишномаи ҳамкорӣ ба имзо расид
Масъалаи ҳамкорӣ дар соҳаи маорифи Тоҷикистон ва Зимбабве баррасӣ гардид
Маркази эҷодии кӯдакон ва наврасони ноҳияи Фирдавсӣ сазовори Ҷоми «Сарраёсати маорифи шаҳри Душанбе» гардид
Дар 21 шаҳру ноҳияҳои Тоҷикистон барои кормандони муваққатии марказҳои имтиҳонӣ машварати омӯзишӣ баргузор мегардад
Даври дуюми бақайдгирӣ барои иштирок дар имтиҳонҳои марказонидаи дохилшавӣ аз моҳи июн оғоз мешавад
Ҷавонони боистеъдоди тоҷик дар беҳтарин муассисаҳои таҳсилоти олии давлатҳои пешрафтаи ҷаҳон таҳсил доранд
Дар Вазорати маориф ва илм рафти иҷрои барномаҳои давлатии соҳаи маориф дар шаҳру ноҳияҳои тобеи ҷумҳурӣ баррасӣ гардид
Дар Донишгоҳи байналмилалии забонҳои хориҷии Тоҷикистон Маркази иттилоот, инноватсия ва рақамикунонӣ ифтитоҳ гардид
Президенти Тоҷикистон: «Барои таълиму тарбияи наврасону ҷавонон 11 лоиҳаи сармоягузории давлатӣ татбиқ мегардад»
Суханронии Президенти Федератсияи футболи Тоҷикистон муҳтарам Рустами Эмомалӣ ба муносибати нахустин Рӯзи ҷаҳонии футбол
