МАҶАЛЛАИ «ФИРӮЗА». Таҷассумгари розу ниёз ва орзуву ормонҳои занони тоҷик аст

Март 11, 2023 09:02

ДУШАНБЕ, 11.03.2023 /АМИТ «Ховар»/. Маҷаллаи «Фирӯза» дар инъикоси фаъолияти босамар ва ибратбахши занону духтарони мамлакат дар замони соҳибистиқлолӣ нақши назаррас мегузорад. Дар ин муддат дар маҷалла садҳо бонувони суханвар тарбия ёфтаанд. Аз ҷумла, журналистон — Музаффара Рустамова, Ф. Алиева, шоираҳои шинохта — Гулчеҳра Сулаймонӣ, Гулрухсор Сафиева, Зулфия Атоӣ, Ҳадиса Қурбонова, Мавҷуда Ҳакимова, олимон -академик Хуршеда Отахонова, Лола Сулаймонӣ ва садҳо нафари дигар зимни кор дар ин маҷалла таҷрибаи корӣ омўхтаву ба камоли эҷодӣ расидаанд. Чунин иброз дошт сармуҳаррири маҷаллаи «Фирӯза» Мавҷудаи Саид дар суҳбат бо хабарнигори АМИТ «Ховар» бахшида ба Рӯзи матбуоти тоҷик.

Мавсуф дар идомаи суҳбат иброз намуд, ки ««Фирӯза» нахустин маҷаллаи тоҷикист, ки махсус барои занон таъсис ёфта, дар таърихи фарҳангу маънавиёт ва матбуоти тоҷик нақши муҳим бозидааст. Аввалин маротиба 1 майи соли 1932 шумораи нахустини маҷалла барои занони коргару деҳқон бо теъдоди 4000 нусха бо хати лотинӣ нашр шудааст. Ин маҷалла дар тӯли солҳои мавҷудият, аз ҷумла ба «Занони Тоҷикистон» табдили ном кардааст».

«Дар он солҳои нахустини таъсис маҷалла бештар матолибе нашр мекард, ки барои занон ба сифати роҳнамо хизмат кунад. Соли 1951 маҷалла бо номи «Занони Тоҷикистон» ба табъ расид, ки Саида Холиқова муҳаррири маҷалла буд. Сипас Хайринисо Муҳиддинова ва Мавҷуда Ҳакимова онро роҳбарӣ намуданд. Дар ин давра маҷалла ба яке аз минбарҳои муҳимтарини розу ниёзи бонувон табдил ёфт. Дар ҳар шумораи маҷалла аз ҳаёти занони касбу кори гуногун матолиби хонданӣ ба нашр мерасид. Бонувони эҷодкор тариқи «Занони Тоҷикистон» ба ҷомеа муаррифӣ мешуданд»,- ёдовар шуд Мавҷудаи Саид.

Ба иттилои ў, аз оғози солҳои навадуми асри гузашта маҷалла бо ибтикори сардабири он шоира Мавҷуда Ҳакимова номи «Фирӯза»-ро гирифт. Имрӯз Муассисаи давлатии Маҷаллаи «Фирӯза» нашрияи сиёсию иқтисодӣ ва фарҳангӣ буда, бештар аз ҳаёт ва фаъолияти бонувон матлабҳо чоп мекунад.

Дар замони соҳибистиқлолии мамлакат имконият фароҳам омад, ки даҳҳо рӯзномаву маҷалла барои бонувон ба табъ расанд, вале бо мурури замон бархе аз фаъолият бозмонда ва бархе то ҳол нашр мешаванд. Вале дар ин радиф мақоми «Фирӯза» ҳамоно чун модари матбуоти тоҷик барои занони Тоҷикистон баланд аст.

Фирӯза ДАВЛАТЗОДА,
АМИТ «Ховар»

АКС аз манбаъҳои боз

Март 11, 2023 09:02

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
Ҳангоми истифодаи хабару маводи сомона истинод ба www.khovar.tj ҳатмӣ аст!
Саҳифаҳои расмии АМИТ «Ховар» дар шабакаҳои иҷтимоӣ: facebook.com/niatkhovar, t.me/niatkhovar, youtube.com/@niat_Khovar_tj, instagram.com/niat_khovar/, twitter.com/niatkhovar, Радиои Ховар 101.5 fm, facebook.com/khovarfm/
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад