Қонун «Дар бораи тарбияи ватандӯстӣ» ба пешгирии ифротгароӣ ва рушди тафаккури миллӣ нигаронида шудааст

ДУШАНБЕ, 18.03.2023 /АМИТ «Ховар»/. Ҷиҳати дар амал татбиқ намудани талаботи Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» дар Вилояти Мухтори Кӯҳистони Бадахшон мулоқоти навбатии роҳбарияти Раёсати Вазорати корҳои дохилӣ бо фаъолону сокинони ноҳияи Ванҷ баргузор гардид. Дар ин хусус ба мухбири АМИТ «Ховар» дар Раёсати Вазорати корҳои дохилӣ дар ин вилоят хабар доданд.

Тавре гуфта шуд, ҳадафи асосии вохӯрӣ ба таҳким бахшидани ҳамкории милитсия бо ҷомеа, масъалаҳои баланд бардоштани маърифати ҳуқуқӣ, таҳкими худшиносиву худогоҳии ҷавонон, пешгирии кирдорҳои зиддиҳуқуқӣ дар байни ҷавонон ва дар якҷоягӣ бо аҳли ҷамоат муайян ва рафъ кардани сабабу шароити ба шомилшавии ҷавонони ноҳия ба ифротгароӣ мусоидаткунанда нигаронида шуд.

Таъкид гардид, ки  вазъи пуртазоди ҷаҳони муосир моро водор месозад, ки ҳушёриву зиракии сиёсиро аз даст надода, ҳамеша дар ҳолати омодабош қарор дошта бошем ва барои пойдории сулҳу суботи мамлакати азизамон аз худ ҳисси баланди ватандӯстӣ нишон диҳем.

Дар вохӯрӣ бо сокинони ноҳияи Ванҷ ҳамзамон дар хусуси нақшаи даъват ва сафарбарии ҷавонон ба сафи Қувваҳои мусаллаҳи мамлакат, омӯхтани мактаби далериву мардонагӣ, хизмат ба Ватан-Модар ва шароити таъминотии муҳайёгардида дар қисмҳои низомию ҳарбӣ сухан гуфта шуд.

Дар ҷараёни вохӯрӣ иштирокдорон баён доштанд, ки ҷиҳати аз байн бурдани падидаҳои номатлуб ва халалдоркунандаи суботу оромӣ дастҷамъона талош меварзанд.

АКС аз Раёсати Вазорати корҳои дохилӣ дар Вилояти Мухтори Кӯҳистони Бадахшон