Ҷайҳун: 400 тонна пиёзи барвақтӣ ба фурўш бароварда шуд

ДУШАНБЕ, 19.04.2023. /АМИТ «Ховар»/. Қариб 400 тонна пиёзи барвақтии хоҷагидорони ноҳияи Ҷайҳуни вилояти Хатлон аллакай ба бозорҳои шаҳру ноҳияҳои мамлакат ба фурўш бароварда шуд, ки он ба паст гардидани нархи ин маҳсулоти ниёзи аввалия мусоидат намуд, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон.

Тибқи иттилои манбаъ, ҳудуди 10 рӯз аст, ки дар ин ноҳия хоҷагидорони пешқадам пайи ҷамъоварии ҳосили пиёз гашта, арзиши онро ба 3 ва 3 сомону 50 дирам поин намуданд.

Тавре мутахассиси шуъбаи кишоварзии ноҳияи Ҷайҳун Қудбиддин Аминов иттилоъ дод, соли равон деҳқонони ноҳия дар майдони 3 ҳазору 400 гектар пиёзи барвақтии навъи тунис кишт карда, то имрӯз беш аз 20 гектари онро ҷамъоварӣ намуданд.

«Ҳосили пиёз дар саҳро фаровон буда, хоҷагидорон аз 1 гектар 400-450 сентнер ҳосил ба даст оварда истодаанд»,- илова кард ў.

АКС: Мақомоти иҷроияи ҳокимияти давлатии вилояти Хатлон