«Амонатбонк» ва «Бонки рушди Қазоқистон» тасмим гирифтаанд, ки Созишномаи хати қарзӣ ба имзо расонанд

ДУШАНБЕ, 28.04.2023 /АМИТ «Ховар»/. Масъалаҳои тақвияти ҳамкорӣ байни «Амонатбонк» ва «Бонки рушди Қазоқистон» дар самтҳои гуногун зимни  мулоқоти раиси Раёсати Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк» Сироҷиддин Икромӣ бо раиси Раёсати Ҷамъияти саҳомии  «Бонки рушди Қазоқистон» Нурлан Байбазаров, ки  дар ҳошияи ҷаласаи Шӯрои Иттиҳоди байнибонкии Созмони хамкории Шанхай дар иёлати Гоаи Ҳиндустон баргузор гардид, баррасӣ карда шуд.

Ба АМИТ «Ховар» дар Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк» иттилоъ доданд, ки мусоҳибон  ҳамзамон масъалаҳои марбут ба табодули таҷриба ва маблағгузории савдо барои рушди гардиши молу маҳсулот байни Тоҷикистон ва Қазоқистонро мавриди баррасӣ қарор доданд.

Раиси Раёсати Ҷамъияти саҳомии «Бонки рушди Қазоқистон» Нурлан Байбазаров пешниҳод намуд, ки омода аст ояндаи наздик бо «Амонатбонк» Созишномаи хати қарзӣ ҷиҳати рушди гардиши молу маҳсулот байни Ҷумҳурии Қазоқистон ва Ҷумҳурии Тоҷикистонро  ба имзо расонад.

Раиси Раёсати Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк» Сироҷиддин Икромӣ пешниҳоди роҳбарияти «Бонки рушди Қазоқистон»-ро бо хушнудӣ пазируфта, омодагии ҳамаҷонибаи худро дар самтҳои манфиатнок иброз намуд.

    АКС: «Амонатбонк»