Ғолибони бозиҳои даври сеюми Чемпионати Тоҷикистон байни дастаҳои Лигаи олӣ муайян шуданд

ДУШАНБЕ, 13.04.2023 /АМИТ «Ховар»/. 12 апрел бозии даври сеюми Чемпионати Тоҷикистон байни дастаҳои Лигаи олӣ дар байни дастаҳои футболи «Равшан»-и шаҳри Кӯлоб ва «Хатлон»-и шаҳри Бохтар доир шуд.

Вохӯрии дастаҳо дар Варзишгоҳи марказии шаҳри Кӯлоб хеле ҷолиб баргузор шуда, бо ҳисоби 0 бар 1 ба нафъи дастаи «Хатлон»-и шаҳри Бохтар анҷом ёфт. Ягона голро дар идомаи вохӯрӣ Умарҷон Шарипов аз ҳайати дастаи «Хатлон»-и шаҳри Бохтар дар дақиқаи 75-ум ба нишон расонид. Дар дақиқаи 61-ум ҳамлагари дастаи «Равшан» Абдулфаттоҳ Худойдодзода пас аз вайрон кардани қоидаи бозӣ корти сурх гирифт ва аз бозӣ берун карда шуд. Умарҷон Шарипов аз ҳайати дастаи футболи «Хатлон»-и шаҳри Бохтар беҳтарин бозингари вохӯрӣ дониста шуд.

Қобили тазаккур аст, ки ин аввалин ғалабаи дастаи «Хатлон»-и шаҳри Бохтар дар мавсими имсолаи Лигаи олӣ маҳсуб мешавад. Қаблан дастаи «Хатлон»-и шаҳри Бохтар дар бозии даври аввал аз дастаи «Регар-ТадАЗ»-и шаҳри Турсунзода бо ҳисоби 3 бар 1 ва дар бозии даври дуюм аз дастаи футболи «Эсхата»-и шаҳри Хуҷанд бо ҳисоби 2 бар 0 мағлуб гардида буд.

Дастаи футболи «Равшан»-и шаҳри Кӯлоб аввалин бохташро ба қайд гирифт. Онҳо дар бозии даври аввал ба муқобили дастаи «Кӯктош»-и ноҳияи Рӯдакӣ бо ҳисоби 3 бар 1 пирӯз шуда, дар бозии даври дуюм ба муқобили дастаи КМВА-и шаҳри Душанбе 0 ба 0 мусовӣ бозӣ карданд.

Ҳамчунин 12 апрел бозии дигари даври сеюми Чемпионати Тоҷикистон оид ба футбол байни дастаҳои футболи «Эсхата»-и шаҳри Хуҷанд ва «Хуҷанд»-и шаҳри Хуҷанд дар сатҳи баланд баргузор гардид.

Вохӯрии дастаҳо дар варзишгоҳи «Спартак»-и шаҳри Хуҷанд доир шуда, бо ҳисоби 0 бар 1 ба нафъи дастаи футболи «Хуҷанд»-и шаҳри Хуҷанд анҷом ёфт.

Ягона голро дар ҷараёни вохӯрӣ Бом-Гин Бе аз ҳайати дастаи «Хуҷанд»-и шаҳри Хуҷанд дар дақиқаи 26-ум ба нишон расонид. Азизбек Ҳаитов аз ҳайати дастаи «Хуҷанд»-и шаҳри Хуҷанд беҳтарин бозингари вохӯрӣ дониста шуд.

Ин аввалин ғалабаи дастаи «Хуҷанд»-и шаҳри Хуҷанд дар мавсими имсолаи Лигаи олӣ аст. Қаблан дастаи футболи «Хуҷанд»-и шаҳри Хуҷанд дар бозии даври аввал аз дастаи футболи «Истиқлол»-и шаҳри Душанбе бо ҳисоби 4 бар 0 мағлуб шуда, дар даври дуюм бо дастаи «Регар-ТадАЗ»-и шаҳри Турсунзода мусовӣ бозӣ карда буд.

Дастаи «Эсхата»-и шаҳри Хуҷанд бо аввалин бохт рӯ ба рӯ гардид. Онҳо дар бозии даври аввал ба муқобили дастаи КМВА-и шаҳри Душанбе бо ҳисоби 3 бар 2 ва ба муқобили дастаи футболи «Хатлон»-и шаҳри Бохтар бо ҳисоби 2 бар 0 пирӯз шуда буданд.

Ёдовар мешавем, ки дар даври навбатии чемпионати Тоҷикистон байни дастаҳои Лигаи олӣ «Эсхата»-и шаҳри Хуҷанд дар даври навбатӣ 15 апрел бо дастаи футболи «Регар – ТадАЗ»-и шаҳри Турсунзода дар мизбонӣ бозӣ мекунад. Дастаи футболи «Хатлон»-и шаҳри Бохтар бо дастаи «Ҳосилот»-и ноҳияи Фархор вориди рақобат мегардад. Вохӯрии дастаҳо 16 апрел дар варзишгоҳи марказии шаҳри Ҳисор доир мегардад.

Дастаи футболи «Равшан»-и шаҳри Кӯлоб дар даври навбатӣ 16 апрел бо дастаи футболи «Хуҷанд»-и шаҳри Хуҷанд дар сафар бозӣ мекунад.

Дар ҷадвали мусобиқа дастаи футболи «Истиқлол»-и шаҳри Душанбе ҳоло бо касби 7 имтиёз садрнишин аст. Дастаи футболи «Эсхата»-и шаҳри Хуҷанд бо 6 имтиёз дар зинаи дуюм ва дастаи «Регар-ТадАЗ»-и шаҳри Турсунзода бо 5 имтиёз дар зинаи 3-юми ҷадвали мусобиқот ҷой гирифтаанд. Дастаи футболи «Кӯктош»-и ноҳияи Рӯдакӣ дар зинаи охир бе имтиёз ҷойгир аст.

Меҳрони ҚУРБОН,
АМИТ «Ховар»

АКС: Федератсияи футболи Тоҷикистон