Президенти Ҷумҳурии Тоҷикистон Эмомалӣ Раҳмон дар ноҳияи Ҷаббор Расулов марҳилаи дуюми ҳавзҳои парвариши гулмоҳиро ба истифода доданд

Апрель 1, 2023 11:20

ДУШАНБЕ, 01.04.2023 /АМИТ «Ховар»/. 1 апрел Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Ҷаббор Расулов марҳилаи дуюми ҳавзҳои парвариши гулмоҳиро ба истифода дода, аз намоиши дастовардҳои Ҷамъияти дорои масъулияти маҳдуди «Корпоратсияи моҳии тоҷик» боздид намуданд.

Ҳавзҳои гулмоҳипарварӣ дар доираи дастуру супоришҳои Сарвари давлат муҳтарам Эмомалӣ Раҳмон аз ҷониби Ҷамъияти дорои масъулияти маҳдуди “Корпоратсияи моҳии тоҷик” дар масоҳати 1 гектар ташкил гардида, дар онҳо парвариши 100 ҳазор моҳича ба роҳ монда шудааст.

Ин тадбир аз иқдомҳои муҳим дар самти амалишавии “Барномаи давлатии рушди соҳаи моҳипарварӣ” маҳсуб ёфта, барои таъмини ҳадафи стратегии амнияти озуқаворӣ, фаровонии бозори дохилӣ бо маҳсулоти худӣ ва боло бардоштани иқтидори содиротӣ мусоидат мекунад.

Бо ифтитоҳи ҳавзҳои парвариши гулмоҳӣ дар ноҳияи Ҷаббор Расулов 12 нафар бо ҷойи кор таъмин шуда, тибқи нақша соли аввал истеҳсоли 100 тонна гӯшти парҳезӣ дар назар аст.

Дар асоси тавсияи мутахассисон бо мақсади зиёд намудани кислород, ки дар инкишофи моҳӣ нақши муҳим дорад, аз хориҷи кишвар 10 аэратор ворид ва дар ҳавзҳо гузошта шудааст.

Дар як қисми ҳавзҳо ҳамчун таҷриба парвариши тосмоҳӣ (остёра) низ ба роҳ монда шудааст, ки ба таъкиди масъулон натиҷаҳои хуб ба назар мерасад.

Ёдовар мешавем, ки марҳилаи аввали ҳавзҳои парвариши гулмоҳӣ дар ноҳияи Ҷаббор Расулов 29 июли соли 2021 дар масоҳати 40 садяк замин бо иштироки Президенти Ҷумҳурии Тоҷикистон муҳтарам Эмомалӣ Раҳмон ба истифода дода шуда буд.

Ба андешаи масъулон баъди ифтитоҳи нахустин хоҷагии гулмоҳипарварӣ дар ноҳияи Ҷаббор Расулов пешравиҳои назаррас дар соҳаи моҳидорӣ ва моҳипарварӣ дар ҳудуди вилояти Суғд ба миён омад.

Корҳои сохтмонӣ дар марҳилаи дуюми ҳавзҳои моҳипарварии “Корпоратсияи моҳии тоҷик” дар ноҳияи Ҷаббор Расулов бо ҷалби 50 нафар мутахассиси Ҷамъияти дорои масъулияти маҳдуди “Хайри Сафо” дар давоми 6 моҳ бо сифати баланд ба анҷом расонда шудаанд.

Иттилоъ дода шуд, ки то соли 2025 дар ҳамаи беш аз 3 гектар заминҳои “Корпоратсияи моҳии тоҷик” дар деҳоти Деҳмойи ноҳияи Ҷаббор Расулов ҳавзҳо таъсис дода шуда, дар марҳилаи сеюм асосан парвариши тосмоҳӣ ба роҳ монда мешавад. Бо пурра ташкил намудани ҳавзҳои моҳипарварӣ иқтидори истеҳсолӣ то 500 тонна дар як сол расонда хоҳад шуд.

Дар ноҳияи Ҷаббор Расулов имрӯз 5 хоҷагии моҳипарварӣ фаъолият дорад ва соли гузашта наздики 38 тонна маҳсулот истеҳсол гардидааст. Моҳипарварони ноҳия соли равон 2,8 тонна гушти парҳезӣ истеҳсол кардаанд ва то охири соли равон истеҳсоли 45 тонна маҳсулот дар назар аст.

Президенти мамлакат муҳтарам Эмомалӣ Раҳмон пас аз ифтитоҳи ҳавзҳои гулмоҳипарварӣ аз намоиши дастовардҳои Ҷамъияти дорои масъулияти маҳдуди “Корпоратсияи моҳии тоҷик” дидан намуданд.

Дар намоишгоҳ беш аз 10 зоти моҳӣ, консерваҳо аз моҳӣ, моҳиҳои дудандохташуда, хӯрокаи он ва харитаи ҷойгиршавии “Корпоратсияи моҳии тоҷик” дар шаҳру ноҳияҳои мамлакат муаррифӣ карда шуд.

Президенти мамлакат муҳтарам Эмомалӣ Раҳмон иқдоми роҳбарияти Ҷамъияти дорои масъулияти маҳдуди “Корпоратсияи моҳии тоҷик”-ро дар самти мусоидат ба рушди соҳаи моҳипарварӣ, таъсиси ҷойҳои нави корӣ, амалисозии ҳадафи стратегии таъмини амнияти озуқаворӣ боиси дастгирӣ арзёбӣ намуда, барои боз ҳам афзоиш додани ҳаҷми истеҳсоли маҳсулот ва баланд бардоштани иқтидори содиротӣ бо истифода аз имкониятҳои мавҷуда ба масъулон дастуру супоришҳои мушаххас доданд.

Ифтитоҳи марҳилаи дуюми ҳавзҳои парвариши гулмоҳӣ дар ноҳияи Ҷаббор Расулов 01.04.2023

Апрель 1, 2023 11:20

Хабарҳои дигари ин бахш

Дар Шуғнон корхонаи нави истеҳсоли асфалт ба фаъолият оғоз кард
Президенти Ҷумҳурии Тоҷикистон Эмомалӣ Раҳмон ба Иёлоти Муттаҳидаи Амрико сафар намуданд
Дар Хоруғ корхонаи истеҳсоли макарон бунёд карда мешавад
Ҳайати Тоҷикистон бо намояндагони шуъбаи кафолатҳои Агентии байналмилалии неруи атомӣ мулоқот намуд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар вохӯрӣ бо роҳбарону кормандони Кумитаи ҳифзи муҳити зист
Сарвари давлат Эмомалӣ Раҳмон бо роҳбарону кормандони Кумитаи ҳифзи муҳити зист мулоқот намуданд
Пешвои миллат Эмомалӣ Раҳмон ба таври фосилавӣ биноҳои истиқоматии Агентии обуҳавошиносиро ба истифода доданд
Президенти Ҷумҳурии Тоҷикистон Эмомалӣ Раҳмон дар шаҳри Душанбе бинои нави Кумитаи ҳифзи муҳити зистро ифтитоҳ намуданд
Пешвои миллат Эмомалӣ Раҳмон дар ноҳияи Синои шаҳри Душанбе меҳмонхонаи 5 ситорадори “Кровн Плаза Душанбе”-ро мавриди истифода қарор доданд
Сарвари давлат Эмомалӣ Раҳмон Раиси Жогорку Кенеши Ҷумҳурии Қирғизистон Нурланбек Тургунбек уулуро ба ҳузур пазируфтанд
Президенти Ҷумҳурии Тоҷикистон Эмомалӣ Раҳмон бо Раиси Ҷумҳурии Исломии Эрон Масъуди Пизишкиён мулоқот намуданд
Президенти Ҷумҳурии Тоҷикистон Эмомалӣ Раҳмон дар ҷаласаи ғайринавбатии сарони кишварҳои арабӣ ва аъзои СҲИ иштирок намуданд