Тоҷикистон ва Британияи Кабир 23 санади нави ҳамкорӣ ба маблағи умумии зиёда аз 370 миллион доллари амрикоӣ ба имзо расониданд

Апрель 1, 2023 09:55

ДУШАНБЕ, 01.04.2023 /АМИТ «Ховар»/. 28-29 марти соли 2023 дар шаҳри Лондон бо дастгирии Ҳукумати Ҷумҳурии Тоҷикистон ва бо ташаббуси Сафорати Ҷумҳурии Тоҷикистон дар Подшоҳии Муттаҳидаи Британияи Кабир ва Ирландияи Шимолӣ Анҷумани сармоягузорӣ ва рушди Тоҷикистон баргузор гардид.

Дар кори ин Анҷуман, ки дар таърихи равобити дуҷонибаи Тоҷикистону Британияи Кабир бори нахуст баргузор гардид, доираи васеи роҳбарону масъулини вазорату идораҳои Тоҷикистон, соҳибкорону сармоягузорон, роҳбарият ва намояндагони ширкату корхонаҳои бонуфузи ҷаҳон иштирок намуданд.

Аз ҷониби Тоҷикистон дар ин ҳамоиш роҳбарияти Кумитаи давлатии сармоягузорӣ ва идораи амволи давлатӣ, вазоратҳои корҳои хориҷӣ, кишоварзӣ, энергетика ва захираҳои об, саноат ва технологияҳои нав, нақлиёт, молия, Бонки миллии Тоҷикистон ва масъулони дигар ниҳодҳои давлатӣ иштирок намуданд.

Мақсад аз баргузории анҷумани мазкур аз таҳкиму густариши ҳамкориҳои тиҷоратию сармоягузорӣ аз тариқи ташкили муколамаи озод байни соҳибкорону сармоягузорон ва дар ин замина дарёфти роҳҳои нави амалӣ дар самти бунёд ва таъсиси корхонаҳои муштарак иборат буд.

Дар чаҳорчӯби Анҷумани мазкур, ки аз нишастҳои ифтитоҳӣ ва нишастҳои дигари пленариву мавзӯӣ иборат буд, вохӯриҳои дуҷонибаи ҳайатҳои расмии соҳибкорони Тоҷикистону Британияи Кабир дар қолаби “Соҳибкор бо соҳибкор” (В2В) ва “Соҳибкор бо Ҳукумат” (B2G) доир гардид.

Дар ҳошияи ин анҷуман ҳамчунин, ҷиҳати муаррифии иқтидори истеҳсолӣ ва содиротии Ҷумҳурии Тоҷикистон намоиши молу маҳсулоти бахшҳои саноат, истихроҷ, кишоварзӣ, сайёҳӣ ва хизматрасонии бонкӣ низ ташкил карда шуд. Дар ҷараёни намоиш ба соҳибкорони хориҷӣ оид ба фазову имкониятҳои сармоягузорӣ ба соҳаҳои афзалиятноки иқтисоди миллии Тоҷикистон маълумоти муфассал ва лоиҳаҳои мушаххаси сармоягузорӣ барои баррасии минбаъда пешниҳод гардид.

Дар натиҷаи мулоқоту музокироти аъзои ҳайатҳои расмӣ ва соҳибкорон байни субъектҳои бахши давлатию хусусии ду давлат ва ширкатҳои хусусӣ 23 санади нави ҳамкорӣ ба маблағи умумии зиёда аз 370 миллион доллари амрикоӣ имзо шуд.

Баргузории Анҷумани мазкур дар оянда барои муаррифии бештару воқеии иқтидори содиротӣ, ҷалби бештари сармояву воридоти техникаву технологияҳои муосир ва тақвияти ҳамкориҳои дуҷонибаи Тоҷикистону Британияи Кабир дар соҳаи иқтисоду сармоягузорӣ мусоидат менамояд.

Дар хотимаи Анҷумани сармоягузорӣ ва рушди Тоҷикистон бо ташаббуси Сафорати Ҷумҳурии Тоҷикистон дар Подшоҳии Муттаҳидаи Британияи Кабир ва Ирландияи Шимолӣ ҷиҳати таҷлили сазовор аз Иди байналмилалии Наврӯз бо иштироки меҳмонони Анҷуман ва роҳбарони намояндагиҳои корпуси дипломатии муқими Лондон барномаи фарҳангӣ-фароғатӣ ташкил карда шуд.


АКС: Сафорати Ҷумҳурии Тоҷикистон дар Подшоҳии Муттаҳидаи Британияи Кабир ва Ирландияи Шимолӣ

Апрель 1, 2023 09:55

Хабарҳои дигари ин бахш

ФУТБОЛ. Замони оғози бозиҳои мусобиқаи «Cafa Nations Cup-2023» тасдиқ шуд
Дар Душанбе ҷаласаи ҳаштуми Шӯрои миллии суботи молиявӣ дар Ҷумҳурии Тоҷикистон баргузор гардид
«ИСТЕҲСОЛИ ТОҶИКИСТОН». Таҳти ин тамға корхонаи «Субҳи Ватан»-и Исфара содироти меваи хушкро ба роҳ мондааст
«Buta Airways» дар масири Боку-Душанбе-Боку нахустин парвози мустақимро анҷом дод
Ғолибони даври чоруми марҳилаи аввали Чемпионати ҷаҳон оид ба шоҳмот муайян шуданд
Бори аввал дар Тоҷикистон ба парвариши моҳии навъи «бестер» хоҷагии «Моҳипарварии Каёнуш»-и ноҳияи Данғара шуруъ менамояд
«КӮКНОР-2023». Дар вилояти Суғд амалиёти пешгирикунанда гузаронида мешавад
Бори аввал дар Тоҷикистон Форуми ҷумҳуриявии «Омӯзгори навовар» баргузор гардид
ГРАН-ПРИИ ДУШАНБЕ-2023. Дзюдочиёни зиёда аз 40 давлати панҷ қитъаи ҷаҳон ба Тоҷикистон меоянд
Дар Донишгоҳи давлатии Кӯлоб оид ба ҷаҳонбинии нави иттилоотӣ конфронси ҷумҳуриявӣ баргузор шуд
Дар Душанбе бори аввал ниммарафони байналмилалии Оne Run баргузор мешавад
Дар моҳи аввали тобистон тоҷикистониёнро чӣ гуна ҳаво интизор аст?