Ҳайати Тоҷикистон дар Вена дар Конфронси байналмилалии «Роҳҳо ба Париж» иштирок намуд

ДУШАНБЕ, 15.06.2023 /АМИТ «Ховар»/. Бо ибтикори Бонки Аврупоии Таҷдид ва Рушд (БАТР) ва дастгирии Фонди ҷаҳонии муҳити зист (GEF) дар Вена Конфронси байналмилалӣ дар мавзуи «Роҳҳо ба Париж» баргузор гардид. Дар кори он зиёда аз 200 намояндаи бонкҳои марказӣ, созмонҳои байналмилалии молиявӣ, бонкҳои тиҷоратӣ, сармоягузорон ва дигар тарафҳои манфиатдори бозорҳои сармояи Осиё, Аврупо ва Африқои Шимолӣ, аз ҷумла намояндагони Бонки миллии Тоҷикистон таҳти роҳбарии муовини якуми раиси Бонки миллии Тоҷикистон Фирдавс Толибзода иштирок намуданд. Дар ин хусус ба АМИТ «Ховар» дар Бонки миллии Тоҷикистон иттилоъ доданд.

Конфронс барои мушаххас намудани масирҳои нав ва омӯзиши таҷрибаи беҳтарин дар самти танзими идоракунии хавфҳо вобаста ба тағйирёбии иқлим, тақвияти иқтидори муассисаҳои молиявӣ ва идоракунии корпоративии иқлим зимни вокуниш ба тағйирёбии он, банақшагирии гузариш ва вусъати амалиёти молиявии сабз имконияти васеъ фароҳам овард.

Роҳбари Гурӯҳи ташкилотҳои молиявӣ дар Бонки Аврупоии Таҷдид ва Рушд Франсиз Малиҷе таваҷҷуҳи ҳозиринро ба масъалаҳои муҳим- дурнамои танзиму назорат дар пасманзари имконияту хатарҳои марбут ба иқлим, пешбурди ҳадафҳои Созишномаи Париж (Paris Agreement) тавассути ифшои маълумот оид ба иқлим ва рушди устувор ҷалб намуд.

Байни намояндагони бонкҳои марказии/миллии Аврупо, Гурҷистон, Миср, Арманистон, Марокаш, Монтенегро, Комиссияи Аврупо, Шабакаи бонкҳои марказӣ ва нозирони масоили сабзгардонии низоми молиявӣ (NGFS), Биржаи коғазҳои қиматноки Варшава, Шўрои байналмилалии меъёрҳои устуворӣ (ISSB), «Bank al Etihad» (ташкилоти қарзии давлати Урдун) «JP Morgan», «Goldman Sachs», Бонки Африқо, Бонки Шветсия ва Агентии танзиму назорати бонкии Туркия мубодилаи афкор доир гардид.

Масъалаҳои таҳияи стратегияҳои мутобиқшавӣ ба иқлим, омода намудани нақшаҳои гузариш ба иқтисоди сабз, идоракунии хавфҳо ва имкониятҳои ҷойдошта дар самти истифодаи навовариҳо ва технологияҳои иттилоотӣ, рушди бозори коғазҳои қиматноки сабз, суръатбахшии афзоиши иқтидори бозорҳои сармоягузорӣ ва қарзии сабз дар соҳаҳои гуногуни иқтисодӣ аз ҷониби муассисаҳои молиявии пешқадам баррасӣ шуданд.

Дар идомаи конфронс Бонки «Арванд» дар озмуни солонаи Бонки Аврупоии Таҷдид ва Рушд оид ба рушди устувор ва ҳалли масъалаҳои муҳити зист ва иҷтимоӣ, афзоиши самарабахшии энергия ва муқовимат бо тағйирёбии иқлим ғолиб ва сазовори ҷоизаи нуқра гардид.

АКС: Бонки миллии Тоҷикистон