Дар Норак масъалаи таълиму тарбияи фарзандон ва зери назорат қарор додани онҳоро баррасӣ намуданд

Июль 7, 2023 19:10

НОРАК, 07.07.2023. /АМИТ «Ховар»/. Гурӯҳи кории Мақомоти иҷроияи ҳокимияти давлатии шаҳри Норак бо соҳибкорони бозори «Сомониён»-и шаҳр мулоқот намуд, ки дар он зуҳуроти номатлуби ҷомеа, аз ҷумла шомилшавии ҷавонон ба ҳизбу ҳаракатҳои мамнуъ, таълиму тарбияи насли наврас, ба шуғли босамар фаро гирифтани онҳо мавриди муҳокима қарор гирифт. Дар ин хусус ба хабарнигори минтақавии АМИТ «Ховар» дар Мақомоти иҷроияи ҳокимияти давлатии шаҳри Норак иттилоъ доданд.

Дар вохӯрӣ оид ба раванди иҷрои Фармони Президенти Ҷумҳурии Тоҷикистон «Дар бораи Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025» маълумот пешниҳод гардида, гуфта шуд, ки терроризм, экстремизм ва бегонапарастӣ яке аз масъалаҳои хатарзои глобалӣ дар ҷомеаи ҷаҳонӣ ба ҳисоб рафта, содиршавии ҷиноятҳо дар ин самт ба сатҳи иқтисодию иҷтимоии ҷомеа ва мафкураи инсоният таъсири манфӣ мерасонад. Аз ин рӯ, муқовимат дар ин самт ҷузъи сиёсати ҳуқуқии давлат ва Ҳукумати Ҷумҳурии Тоҷикистон буда, амалӣ намудани он раъйи қавии ниҳоди ташаккули заминаҳои боэътимоди ҳуқуқию сиёсӣ, банақшагирии стратегӣ ва ҷалби аҳли ҷомеаро тақозо менамояд.

Муовини раиси шаҳри Норак Зуҳро Ҳакимзода изҳор дошт, ки дар замони муосир сафи низомиёну ҷангиёни гурӯҳҳои террористӣ аз ҳисоби ҷавонони ноогоҳу бесавод меафзояд ва ба назар мерасад, ки дар тамоми кишварҳо ҳамин гуна наврасони ба доми фиреб афтода кам нестанд. Онҳо ҷони худро бехабар аз мақсаду мароми роҳбаронашон қурбон мекунанд. Ноогоҳӣ аз асолати фарҳанги исломӣ ва камсаводӣ муҳимтарин омили гумроҳшавии ин ҷавонон аст.

Дар ин робита номбурда иштирокдоронро даъват намуд, ки дар таълиму тарбияи фарзандон масъулияти ҷиддӣ зоҳир намуда, аз аҳволи онҳо ҳамеша бохабар бошанд.

«Фарзандони Шумо бо кӣ ва дар куҷо вақти худро мегузаронанд? Онҳо ба кадом кор майлу рағбат ва шуғл доранд? Чӣ бояд кард, ки онҳо вақти худро беҳуда нагузаронанд? Ин суолҳое мебошанд, ки ҳар як фард бояд имрўз ба он посух дода тавонад. Зеро бемасъулиятии мову шумо дар таълиму тарбияи фарзанд ба оқибатҳои ногувор оварда мерасонад»,- таъкид кард Зуҳро Ҳакимзода.

Дар охир баён гардид, ки терроризм ба ягон дин, мазҳаб ё миллат хос нест. Моро зарур аст ба ҷаҳолат маърифатро муқобил гузорем ва баҷои муқовимати тамаддунҳо гуфтугӯи тамаддунҳоро ба роҳ монем. То замоне, ки инсоният ба ҳамкорӣ ва гуфтугӯи судманд муваффақ нагардад, хатари терроризм ва ифротгароӣ боқӣ мемонад.

АКС: Мақомоти иҷроияи ҳокимияти давлатии шаҳри Норак

Июль 7, 2023 19:10

Хабарҳои дигари ин бахш

Соли равон 37 муассисаи таҳсилоти ибтидоии касбӣ таъмир ва навсозӣ мегардад
Кормандони Кумита оид ба таҳсилоти ибтидоӣ ва миёнаи касбӣ суханронии Сарвари давлатро ба муносибати Рӯзи дониш якҷоя тамошо намуданд
Ба намояндагони касбу кори гуногуни вилояти Хатлон мукофотҳои давлатӣ тақдим карда шуд
«Барномаи рушди соҳаҳои таҳсилоти ибтидоӣ ва миёнаи касбии Ҷумҳурии Тоҷикистон барои солҳои 2026-2030» қабул гардид
Татбиқи лоиҳаҳои сармоягузорӣ дар соҳаи таҳсилоти ибтидоӣ ва миёнаи касбӣ бо намояндаи Бонки Осиёии рушд баррасӣ гардид
Дар Душанбе оид ба татбиқи иммунизатсия бар зидди вируси папилломаи одам машварати омӯзишӣ оғоз шуд
Татбиқи лоиҳаи «Беҳтарсозии малакаҳои касбӣ ва имконияти бокортаъминшавӣ» баррасӣ гардид
НЕЪМАТЕ ХУШТАР ЗИ ИСТИҚЛОЛ НЕСТ! Муҳимтарин омили таҳкими истиқлоли Тоҷикистон густариши худшиносию худогоҳии миллӣ аст
Сиёсати иҷтимоии Пешвои миллат такягоҳи суботи иҷтимоӣ ва рушди устувори давлат мебошад
Беш аз 15 ҳазор оилаҳои дар минтақаи зериобшавандаи НБО «Роғун» қарордошта бо манзили доимии зист ва қитъаи замини наздиҳавлигӣ таъмин гардиданд
Тоҷикони муқими шаҳри Толяти аз пешрафту дастовардҳои Тоҷикистон ифтихор менамоянд
Дар Тоҷикистон Рӯзҳои иммунизатсияи иловагӣ бар зидди бемориҳои сурхча ва гулафшон оғоз гардид