Дар шаҳри Бохтар бахшида ба Рӯзи кормандони тибби Тоҷикистон ҳамоиш доир шуд

 ДУШАНБЕ, 17.08.2023. /АМИТ «Ховар»/. Имрӯз дар Кохи фарҳанги шаҳри Бохтар бахшида ба Рӯзи кормандони тибби Тоҷикистон ҳамоиш доир гардид. Дар ин хусус АМИТ «Ховар»  бо истинод ба Мақомоти иҷроияи ҳокимияти давлатии вилояти Хатлон хабар медиҳад.

Нахуст ҳозирин бо намоиши кормандони соҳаи тандурустӣ, ки аз шаҳру навоҳии вилоят ҷамъ омада буданд, шинос шуданд. Дар намоиш маводи дорувории тиббӣ, намунаи технологияҳои муосир барои табобати узвҳои гуногуни бадан, барномаҳои рушди соҳаи тандурустӣ ва дигар маводи тиббӣ ба маърази тамошо гузошта шуд.

Гуфта шуд, ки дар айни замон дар вилоят 1785 муассисаи тандурустӣ, аз ҷумла 10 муассисаи кумаки аввалини тиббию санитарӣ, 110 муассисаи беморхонавӣ, 259 маркази махсусгардонида ва 2 маркази ёрии таъҷилӣ фаъолият намуда истодаанд.

Таъкид шуд, ки хушбахтона, дар асоси дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Барномаи давлатии рушди соҳаи тандурустӣ ва ҳифзи иҷтимоии аҳолии вилояти Хатлон барои солҳои 2021–2025» бо маблағи 1 милларду 315 миллион сомонӣ аз ҳисоби ҳамаи сарчашмаҳои маблағгузорӣ ва шарикони рушд тасдиқ гардида, мавриди амал қарор дорад. Ин ғамхории Роҳбари давлат ба беҳдошти сиҳатии мардум ва рушди соҳаи тиб равона шудааст.

Ҳамзамон иттилоъ дода шуд, ки дар самти тайёр намудани кадрҳои баландтахассус ва кам кардани норасоии кадрӣ тадбирҳои зарурӣ андешида шуда истодаанд.

АКС: Мақомоти иҷроияи ҳокимияти давлатии вилояти Хатлон