НИШАСТИ МАТБУОТӢ. Маркази миллии тестӣ гурӯҳҳои ихтисосҳои серинтихоби соли 2023-ро номбар намуд

ДУШАНБЕ, 03.08.2023. /АМИТ «Ховар»/. Маркази миллии тестии назди Президенти Ҷумҳурии Тоҷикистон гурӯҳҳои ихтисосҳои серинтихобро номбар намуд. Дар байни ихтисосҳо класстери 5 (тиб, биология ва варзиш) аз ҳама серинтихоб буда, шумораи довталабони онро интихобкарда 99,14 %-и ҷойҳои нақшавии ин гурӯҳро ташкил медиҳад.

Тавре директори Маркази миллии тестӣ Сабзалӣ Ҷаъфарзода имрӯз зимни нишасти матбуотӣ ба хабарнигорон иброз дошт, солҳои пеш низ ин гурӯҳи ихтисосҳоро довталабон нисбат ба гурӯҳҳои дигар бештар интихоб мекарданд.

Гуфта шуд, ки шумораи хамткунандагони синфи 11 соли равон ҳамагӣ 105 ҳазору 839 нафарро ташкил медиҳад, ки нисбат ба соли 2022 13 ҳазору 853 нафар камтар аст. Аз ин шумора дар давраи асосии бақайдгирӣ ҳамагӣ 68 ҳазору 675 нафар (64,89 %) барои иштирок дар ИМД-2023 худро номнавис намудаанд.

Тибқи омори соли 2022, аз шумораи умумии хатмкардагони синфи 11 ҳамагӣ 61,41 %-ашон барои иштирок дар ИМД худро номнавис намуда буданд.

Зарангези ЛАТИФ,
АМИТ «Ховар»

АКС: АМИТ «Ховар»