Дар Душанбе Маркази минтақавӣ оид ба идоракунии партовҳо таъсис дода мешавад

ДУШАНБЕ, 05.10.2023 /АМИТ «Ховар»/. Дар шаҳри Душанбе бо пешниҳоди Ҳукумати Ҷумҳурии Тоҷикистон дар доираи фаъолияти Комиссияи байнидавлатӣ оид ба рушди устувор Маркази минтақавӣ оид ба идоракунии партовҳо таъсис дода мешавад, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати ҷумҳурӣ.

Таъсиси ин марказ ба рушди ҳамкории минтақавӣ барои коҳиш додани таъсири манфии партовҳо ба муҳити зист, саломатии аҳолӣ ва ташкили шароити зарурӣ барои танзими идоракунии партовҳо, гузариш ба иқтисоди «сабз», баланд бардоштани муомилоти иқтисодӣ ҳамчун ашёи хоми такрористеҳсолкунӣ бо ҷалби донорҳои маблағгузор мусоидат менамояд.

Ҳадафи асосии ташкили Маркази минтақавӣ тавсеаи ҳамкории муштарак ба нафъи тамоми давлатҳои Осиёи Марказӣ дар соҳаи идоракунии партовҳои муосир, ташкили механизми ҳамоҳангсозӣ ва маблағгузорӣ, муайян намудани мушкилоти мавҷудаи давлатҳои Осиёи Марказӣ дар соҳаи идоракунии партовҳо ва коркарди партовҳо тавассути ташаккули механизмҳои самараноки ҳамкории минтақавӣ, манфиатҳои иқтисодии корхонаҳо, ташкилот, баланд бардоштани маърифати экологии аҳолӣ, пешгирии ифлосшавии муҳити зист, кам намудани ҳосилшавии партовҳо, барои истеҳсоли молҳои рӯзгор ҳамчун ашёи хом истифода бурдани партовҳо, истифодаи оқилонаи захираҳои табиӣ ва ноил шудан ба Ҳадафҳои рушди устувор мебошад.

Таҳкими иқтидори Комиссияи байнидавлатии рушди устувори Осиёи Марказӣ ва сохторҳои он, ҳамкории мақомоти ҳифзи муҳити зисти давлатҳои Осиёи Марказӣ дар соҳаи идоракунии партовҳо ҷиҳати ҷалби маблағ аз донорҳо, бахши хусусӣ ва дигар кишварҳои дахлдор аз вазифаҳои дигари марказ мебошад.

Сиёсати ҳадафмандонаи Ҳукумати Тоҷикистон дар масъалаҳои глобалии экологӣ дар сатҳи байналмилалӣ, минтақавӣ ва миллӣ доир ба ҳалли мушкилоти экологӣ ба ҳифзи саломатии аҳолӣ ва истифодаи оқилонаи захираҳои табиӣ равона гардида, аз ҷониби ҷомеаи ҷаҳонӣ мунтазам ҷонибдорӣ меёбад. Қабули силсилаташаббусҳои Ҳукумати Тоҷикистон аз ҷониби Маҷмаи Умумии Созмони Милали Муттаҳид доир ба масъалаҳои марбут ба об исботи ин гуфтаҳо аст.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон