НАҚШИ ПЕШВОИ МИЛЛАТ ДАР РУШДИ ИҚТИСОДИ МИЛЛӢ. Дар Донишгоҳи миллии Тоҷикистон конференсияи илмӣ-назариявӣ доир шуд

ДУШАНБЕ, 17.10.2023. /АМИТ «Ховар»/. Новобаста ба он ки Истиқлолияти давлатии мо дар ибтидо ба моҷарои сиёсӣ рӯ ба рӯ гардид, Ҳукумати Тоҷикистон бо сарварии Пешвои миллат муҳтарам Эмомалӣ Раҳмон ҷиҳати таҳкими пояҳои истиқлол ислоҳоти ҳамаи соҳаҳо ва ташаккули муносибатҳои нави иқтисодиро вазифаи меҳварии худ эълон намуд. Чунин изҳор дошт ректори Донишгоҳи миллии Тоҷикистон, профессор Қобилҷон Хушвақтзода зимни баргузории Конференсияи илмӣ-назариявии «Нақши Пешвои миллат дар рушди иқтисоди миллӣ». Дар ин хусус ба АМИТ «Ховар» дар Донишгоҳи миллии Тоҷикистон хабар доданд.

Ректори донишгоҳ иброз дошт, ки Ҷумҳурии Тоҷикистон баробари соҳибистиқлол гардидан ба гузаронидани ислоҳоти ҷадиди иқтисодӣ зарурат дошт. Ба ин хотир Пешвои миллат 12 декабри соли 1992 дар Иҷлосияи XVI Шурои Олӣ ба мардуми мамлакат зарурати барқарорсозии фаъолияти ҳамаи субъектҳои иқтисодӣ ва рушди муносибатҳои бозориро шарҳу тавзеҳ доданд.

Ҷиҳати дар амал татбиқ намудани ҳадафҳои дар пеш гузошта соли 1994 фармони Сарвари давлат «Дар бораи гузаронидани чорабиниҳои аввалиндараҷа доир ба таъмини ислоҳоти иқтисодӣ ва тезонидани суръати гузариш ба иқтисоди бозорӣ» ба имзо расид. Мазмуну муҳтавои фармони мазкур, пеш аз ҳама, аз иҷрои меъёрҳо ва талаботи муҳими иқтисоди бозорӣ, махсусан озод намудани нархҳои дохилӣ, танзими асъор ва тиҷорати хориҷӣ иборат буд. Дар ин баробар «Барномаи комплексии дигаргунисозиҳои иқтисодӣ барои солҳои 1995-2000» қабул шуд. Барномаи давлатӣ ба заминаҳои озодкунии нархи ҳамаи молу маҳсулот ва хизматрасонӣ, тиҷорати хориҷӣ, вусъат бахшидани ислоҳоти воқеии соҳаи кишоварзӣ, бахши молиявию бонкӣ, хусусигардонии моликияти давлатӣ ва ташаккули ҳуқуқии иқтисоди бозорӣ дар мамлакат асос гузошт.

Дар ҷараёни ҳамоиш мутахассисон иброз доштанд, ки муҳимтарин масъалае, ки заминаи рушди иқтисоди миллиро дар мамлакат гузошт, ҳалли маҳдудияти коммуникатсионӣ, яъне кушодани роҳҳои мошингард, оҳану ҳавоӣ ва таъмини робита бо тамоми минтақаҳои мамлакат ва давлатҳои ҳамҷавор ба ҳисоб меравад. Дар ин муддат аз ҷониби Ҳукумати Тоҷикистон ба масъалаи бунёди роҳҳои дорои аҳамияти минтақавӣ ва байналмилалӣ таваҷҷуҳи махсус ва доимӣ зоҳир гардид.

Ҳанӯз дар ибтидои солҳои соҳибистиқлолӣ Сарвари давлат муҳтарам Эмомалӣ Раҳмон иброз намуда буданд, ки «бояд нақбҳои бузург ва роҳҳои замонавии мошингард бунёд намуда, мамлакатро ба  қаламрави воҳид табдил диҳем ва робитаҳои нақлиётии мамлакатамонро бо мамолики дуру наздик таъмин намоем».

АКС: Донишгоҳи миллии Тоҷикистон