ОБОДИИ МАҲАЛ. Дар деҳаи дурдасти Олимободи ҷамоати Работи шаҳри Турсунзода 4 км роҳи нақлиётгард асфалтпӯш мегардад

ДУШАНБЕ, 05.10.2023 /АМИТ «Ховар»/. Бо мақсади сазовор истиқбол гирифтани 35-солагии Истиқлолияти давлатии Ҷумҳурии Тоҷикистон 4 км роҳи нақлиётгарди деҳаи дурдасти Олимободи ҷамоати Работ асфалтпӯш мегардад. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Турсунзода хабар доданд.

Ташаббускорони ин иқдоми неку шоиста дар марҳилаи аввал 1 км масири нақлиётгардро бо сифати баланд мумфарш намуданд. Дар ин баробар дар дигар деҳаҳои ҷамоат корҳои ободониву созандагӣ, асфалтпӯш ва бетонпӯш намудани роҳҳо бомаром идома дорад.

Ҳамзамон дар идомаи ин ободкориҳо сокинони сарбаланду меҳандӯсти деҳаи Ортиқ Ҷумаеви Ҷамоати деҳоти Навобод бо саҳми дастҷамъонаи соҳибкорону мардуми деҳа асфалтпӯшкунии 3 км роҳи байнидеҳавиро ба анҷом расониданд, ки ин гувоҳ аз иттиҳоду якдилии соҳибкорон ва мардуми деҳаи мазкур мебошад.

Бояд гуфт, ки иқдоми асфалтпӯшкунии роҳҳои маҳаллӣ бо дастгирии Мақомоти иҷроияи ҳокимияти давлатии шаҳри Турсунзода ва саҳми фаъолонаи соҳибкорони бонангу номус ва сокинони деҳот ба ҳукми анъана даромадааст.

АКС: Мақомоти иҷроияи ҳокимияти давлатии шаҳри Турсунзода