Сироҷиддин Муҳриддин дар ҷаласаи Шурои вазирони корҳои хориҷии Созмони ҳамкории иқтисодӣ иштирок намуд
ДУШАНБЕ, 11.10.2023 /АМИТ «Ховар»/. Вазири корҳои хориҷии Ҷумҳурии Тоҷикистон Сироҷиддин Муҳриддин 10 октябри соли 2023 дар шаҳри Шушаи Ҷумҳурии Озарбойҷон дар ҷаласаи 27-уми Шурои вазирони корҳои хориҷии давлатҳои аъзои Созмони ҳамкории иқтисодӣ суханронӣ намуд. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.
Зимни суханронӣ Сироҷиддин Муҳриддин роҷеъ ба самтҳои афзалиятноки ҳамкорӣ дар чаҳорчӯби Созмон ибрози назар намуда, аҳамияти тавсеаи минбаъдаи ҳамгироии иқтисодӣ ва татбиқи лоиҳаҳои сармоягузориро дар соҳаҳои инфрасохтор, энергетика, нақлиёт, саноат ва ғайра таъкид намуд.
Дар фарҷоми ҷаласа вазирон баёнияи Шуша ва якчанд қарори марбут ба фаъолияти Созмони ҳамкории иқтисодиро қабул намуданд.
АКС: Вазорати корҳои хориҷии Ҷумҳурии Тоҷикистон