Дар 10 моҳ дар шаҳри Турсунзода зиёда аз 58 километр роҳҳои маҳаллӣ мумфарш карда шуданд

ТУРСУНЗОДА, 13.11.2023 /АМИТ «Ховар»/.  Бо дастгирии Мақомоти иҷроияи ҳокимияти давлатии шаҳри Турсунзода ва Вазорати корҳои дохилии Ҷумҳурии Тоҷикистон  якуним километр роҳи деҳаи Аҳоруни Ҷамоати деҳоти Қаратоғ мумфарш гардид. Ин роҳ, ки ба талаботи роҳдорӣ ҷавобгӯ набуд, бо ёрдами  мутахассисон ва техникаҳои  Муассисаи давлатии нигоҳдории роҳҳои автомобилгарди шаҳри Турсунзода  мумфарш шуд.

Тавре масъулини Ҷамоати деҳоти Қаратоғи шаҳри Турсунзода ба мухбири минтақавии АМИТ «Ховар» Субҳониддини Маҳмуд иттилоъ доданд, соли 2023 роҳҳои маҳаллии деҳаҳои Ҷовидон ва Меҳробод низ мумфарш  гардиданд.

Сармуҳандиси Муассисаи давлатии нигоҳдории роҳҳои автомобилгарди шаҳри Турсунзода  Амиралӣ Носиров  иброз дошт, ки  дар тавозуни Муассисаи давлатии нигоҳдории роҳҳои автомобилгарди шаҳр ҳамагӣ 282,2 км  роҳҳои автомобилгард мавҷуд мебошанд, ки  аз ин 21,6 км-ро роҳҳои дорои аҳамияти байналмилалӣ,  5,9 км-ро роҳҳои дорои аҳамияти ҷумҳуриявӣ ва 254,7 километрро роҳҳои дорои аҳамияти  маҳаллӣ ташкил медиҳанд.

Давоми 10 моҳи соли равон ба ифтихори ҷашни 35-солагии Истиқлоли давлатӣ ва  бо дастгирии Мақомоти иҷроияи ҳокимияти давлатии шаҳри Турсунзода, Вазорати нақлиёти Ҷумҳурии Тоҷикистон дар ҳамкорӣ бо соҳибкорон, фаъолону  аҳолӣ  зиёда аз 58 км роҳҳои байни деҳаҳо мумфарш шуданд, ки нисбат ба ҳамин давраи соли гузашта  36 км зиёд мебошад. Инчунин роҳҳои деҳаҳои Савлӣ, Қипчоқ, Кадучӣ, Ширкенти деҳоти Работ ва деҳаи Ҳақиқати деҳоти ба номи Т.Тӯйчиев бетонпӯш гардиданд.  Дар ин давра 193 км роҳҳои шаҳри Турсунзода аз таъмири ҷорӣ бароварда шуда, ба давраи гузаронидани зимистон омода шудаанд.

АКС: Мақомоти иҷроияи ҳокимияти давлатии шаҳри Турсунзода