Донишҷӯёни Донишгоҳи давлатии Хуҷанд дар Озмуни ҷумҳуриявии «Фурӯғи субҳи доноӣ китоб аст» соҳиби ҷойҳои намоён шуданд

ДУШАНБЕ, 11.11.2023 /АМИТ «Ховар»/. Донишгоҳи давлатии Хуҷанд ба номи академик Бобоҷон Ғафуров дар даври ҷумҳуриявии озмуни «Фурӯғи субҳи доноӣ китоб аст» бо ишғоли 5 ҷойи намоён ва 3 ҷойи ифтихорӣ дар байни муассисаҳои таҳсилоти олии касбӣ мақоми дуюмро соҳиб гашт, хабар медиҳад АМИТ «Ховар» бо истинод ба ин донишгоҳ.

Дар даври ҷумҳуриявии озмуни «Фурӯғи субҳи доноӣ китоб аст» магистрантон ва донишҷӯёни донишгоҳ панҷ мақоми намоёнро гирифтанд. Аз ҷумла, донишҷӯи факултети филологияи тоҷик Баҳманёр Худойбердиев дар номинатсияи эҷоди назм ҷойи якум, магистранти факултети забонҳои хориҷӣ Малоҳат Амакова дар номинатсияи эҷоди наср ҷойи якум, донишҷӯи факултети филологияи тоҷик Назокат Орипова аз рӯи номинатсияи адабиёти классикӣ ҷойи дуюм, донишҷӯи факултети филологияи рус Фарзона Раҳимова аз рӯи номинатсияи адабиёти ҷаҳон ҷойи сеюм ва донишҷӯи факултети забонҳои шарқ Дилноза Холматова аз рӯи номинатсияи эҷоди назм ҷойи сеюмро соҳиб шуданд.

Ҳамзамон донишҷӯи факултети филологияи тоҷик Муҳаммадиқбол Ашрафзода, докторанти факултети филологияи тоҷик Фаридуншоҳ Абдуллоев ва донишҷӯи факултети забонҳои шарқ Умматалӣ Хоҷаев мақоми ифтихориро соҳиб гаштанд.

Дар самти омода намудани шогирдон ба Озмуни ҷумҳуриявии «Фурӯғи субҳи доноӣ китоб аст» саҳми устодони донишгоҳ- дотсентон Ислом Раҳимов, Сорбон Азизов, Боҳир Раҷабов назаррас ва шоистаи таҳсин аст.

АКС: Донишгоҳи давлатии Хуҷанд ба номи академик Бобоҷон Ғафуров