ХИРМАНАТ ПУРБОР БОДО, ПАХТАКОР! Кишоварзони Ёвон бо истеҳсоли беш аз 23 000 тонна пахта аз иҷрои дурнамо мужда расониданд

ДУШАНБЕ, 11.11.2023 /АМИТ «Ховар»/. Хоҷагиҳои пахтакори ноҳияи Ёвон имсол дар майдони 10 162 гектар пунбадона кишт намуда, бо истеҳсол намудани зиёда аз 23822 тонна пахта аз иҷрои дурнамо мужда расониданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Ёвон хабар медиҳад.

Бояд гуфт, ки ҳосил то ҳол дар саҳро мавҷуд аст ва кишоварзони матиниродаи ноҳия азм доранд, ки онро пурра ҷамъ оварда, ба нуқтаҳои қабул ва корхонаҳои коркарди пахта супоранд.

Ёдовар мешавем, ки аввалҳои моҳи октябр дар ноҳияи Ёвон бо мақсади сари вақт ва беталаф ҷамъ овардани ҳосили пахта ҳашар ташкил гардид, ки дар он зиёда аз 9000 ҳазор нафар кормандони корхонаву муассисаҳо ба саҳро баромада, ба хирман беш аз 460 тонна “тиллои сафед” ворид намуданд.

Ҳамарӯза қариб панҷ ҳазор нафар пахтачину ҳашарчиён ба майдони пахтазор баромада, барои ҷамъоварии саривақтӣ ба пахтакорон кумак мерасонанд.

АКС: Мақомоти иҷроияи ҳокимияти давлатии ноҳияи Ёвон