Имрӯз ҷаласаи якҷояи вакилони Маҷлиси намояндагон ва вакилони Думаи давлатии Маҷлиси Федералии Федератсияи Русия баргузор гардид

ДУШАНБЕ, 10.11.2023 /АМИТ «Ховар»/.  Имрӯз таҳти раёсати раиси кумитаи Маҷлиси намояндагон оид ба корҳои байналмилалӣ, иттиҳодияҳои ҷамъиятӣ ва иттилооти Маҷлиси намояндагони Маҷлиси Олии  Ҷумҳурии Тоҷикистон Саидмурод Фаттоҳзода ва раиси кумитаи Думаи давлатии Маҷлиси Федералии Федератсияи Русия оид ба корҳои Иттиҳоди Давлатҳои Мустақил, ҳамгироии Авруосиё ва робита бо ҳамватанон Леонид Калашников ҷаласаи васеи якҷоя бо иштироки вакилони ин кумитаҳо баргузор гардид. Дар ин хусус АМИТ «Ховар» бо истинод ба Маҷлиси намояндагон хабар медиҳад.

Дар рӯзномаи ҷаласа « Баррасии масъалаҳои рушди минбаъда ва амиқсозии ҳамкории байнипарлумонии Маҷлиси намояндагони Маҷлиси Олии Ҷумҳурии Тоҷикистон бо Думаи давлатии Маҷлиси Федералии Федератсияи Русия», «Дар бораи ҳолат, дурнамо ва таъмини қонунгузории ҳамкории тиҷоратию иқтисодии ду давлат»,  «Дар бораи фаъол намудани фаъолияти пурсамари гурӯҳҳои дӯстии байнипарлумонии Тоҷикистон ва Русия, аз ҷумла  Комиссияи байнипарлумонӣ оид ба ҳамкорӣ байни Думаи давлатии Маҷлиси Федералии Федератсияи Русия ва Маҷлиси намояндагони Маҷлиси Олии Ҷумҳурии Тоҷикистон», «Дурнамои рушди ҳамкории байниминтақавӣ, масъалаҳои сиёсати ҷавонон, муҳоҷирати меҳнатӣ ва табодули таҷриба дар чаҳорчӯби ҷанбаи парлумонӣ» ва «Мубодилаи афкор оид ба рушди ҳамкории дуҷониба дар доираи созмонҳои байналмилалии парлумонӣ» мавриди баррасӣ қарор гирифт.

Дар ҷаласа таъкид шуд ки мулоқоти имрӯза, бешубҳа, рӯйдоди таърихӣ, далели рушди босуръати муносибатҳои Тоҷикистон ва Русия ва таҳкими робитаҳои байнипарлумонӣ мебошад.

Ҳамчунин таъкид шуд, ки бо назардошти аҳамияти таҳкими равобити дуҷониба ва муайян намудани самтҳои нави ояндадори ҳамкорӣ бо Федератсияи Русия, ки шарики стратегии мо аст, Парлумони мамлакат, бахусус Маҷлиси намояндагон минбаъд низ ҷиҳати таҳкими заминаи ҳуқуқӣ тадбирҳои мушаххасу пайваста меандешад.

АКС: Маҷлиси намояндагони Маҷлиси Олии  Ҷумҳурии Тоҷикистон