Пахтакорони ноҳияи Ёвон аз заминҳои хоҷагиҳои деҳқонию дастҷамъӣ зиёда аз 22 209 тонна пахта ҷамъ оварданд

ЁВОН, 04.11.2023. /АМИТ «Ховар»/. Дар натиҷаи самаранок истифода намудани замин дар ноҳияи Ёвон то ин давра  аз заминҳои 1672 хоҷагии деҳқонию дастҷамъӣ зиёда аз 22 209 тонна пахта ҷамъоварӣ гардид. Нақшаи пешбинишудаи ҷамъоварии пахта, ки  имсол 23 820 тонна мебошад, ҳафтаҳои наздик барзиёд иҷро мегардад.  Дар ин хусус ба хабарнигори минтақавии  АМИТ «Ховар» Субҳониддини Маҳмуд масъулини Раёсати кишоварзии ноҳияи Ёвон  иттилоъ доданд.

Дар пахтазори ноҳияи Ёвон  роҳбарият ва кормандони мақомоти иҷроия, ҳайати кормандони ҳамаи ташкилоту муассисаҳои ноҳиявӣ ҳамарӯза иштирок намуда, садҳо тонна пахта ҷамъ меоранд.

Имрӯзҳо дар ҳамаи хоҷагиҳои пахтакори ноҳия мавсими ҷамъоварии пахта босуръат идома дорад. Заҳматкашон аз ҳар рӯзи мавсим самаранок истифода бурда, ҳосили бо ранҷ парваридаашонро ҳам ба воситаи қувваи даст ва ҳам мошинаҳои пахтачинӣ ҷамъоварӣ менамоянд. Аз ҷумла, дар ҷамоатҳои деҳоти Норин, Г. Юсупова ва С.Сурх  990 тонна пахта тариқи мошинаҳои пахтачинӣ ҷамъоварӣ шудааст.

Роҳбарияти ноҳия тасмим гирифтаанд, ки рӯзҳои офтобӣ дар паҳлуи кишоварзон истода, дар иҷрои дурнамои пахтасупорӣ ҳиссаи муносиб гузоранд. Мувофиқи маълумоти оморӣ, то имрӯз дар ҷамъоварии пахта дар ноҳияи Ёвон 12 850 нафар иштирок намуда,  аз ҳисоби пахтачинӣ, ки кори мавсимӣ ба ҳисоб меравад, даромад ба даст меоранд.

АКС: Мақомоти иҷроияи ҳокимияти давлатии ноҳияи Ёвон