Президенти Тоҷикистон дастур доданд, ки дар шаҳру ноҳияҳо шумораи корхонаву коргоҳҳои хурди коркарди меваву сабзавот зиёд гардад

ДУШАНБЕ, 16.11.2023 /АМИТ «Ховар»/. Дар Ҷумҳурии Тоҷикистон барои зиёд намудани шумораи корхонаву коргоҳҳои хурди истеҳсолӣ дар шаҳру ноҳияҳо, бахусус коркарди меваву сабзавот, аз ҷумла хуч, дулона, помидор, бодиринг, пиёзи анзур, инчунин шир ва шолӣ дар ҳамкорӣ бо соҳиборон тадбирҳои мушаххас андешида мешаванд.

Ин тадбир дар робита ба дастури Президенти Тоҷикистон муҳтарам Эмомалӣ Раҳмон, ки 27 октябри соли равон зимни Маҷлиси Ҳукумати Ҷумҳурии Тоҷикистон дода шуд, андешида мешавад.

Сарвари давлат зимни Маҷлиси Ҳукумати мамлакат ба муовини Сарвазири Ҷумҳурии Тоҷикистон Усмоналӣ Усмонзода, Вазорати саноат ва технологияҳои нав якҷо бо роҳбарони гурӯҳҳои корӣ дар вилоят ва шаҳру ноҳияҳо, мақомоти иҷроияи маҳаллии ҳокимияти давлатӣ, раёсати рушди инфрасохтор барои зиёд намудани шумораи корхонаву коргоҳҳои хурди истеҳсолӣ дастуру супоришҳои мушаххас доданд.

Ҳамзамон Роҳбари давлат муҳтарам Эмомалӣ Раҳмон  супориш доданд, ки фаъолияти муназзами корхонаҳои истеҳсолии мавҷуда, бахусус корхонаҳоеро, ки  ифтитоҳ карда шудаанд,  назорат ва таъмин намоянд.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»