Дар Донишгоҳи байналмилалии сайёҳӣ ва соҳибкории Тоҷикистон конфронси байналмилалӣ доир шуд
![](https://khovar.tj/wp-content/uploads/2023/12/408114547_935901374855774_1337108035088861189_n.jpg)
ДУШАНБЕ, 07.12.2023 /АМИТ «Ховар»/. Бахшида ба Рӯзи кормандони мақомоти молияи Ҷумҳурии Тоҷикистон (7 декабр) дар Донишгоҳи байналмилалии сайёҳӣ ва соҳибкории Тоҷикистон бо иштироки мутахассисони соҳа аз Вазорати молияи Ҷумҳурии Тоҷикистон, Кумитаи андози назди Ҳукумати Ҷумҳурии Тоҷикистон, намояндагони донишгоҳҳои ватанӣ ва хориҷӣ, омӯзгорону донишҷӯёни ихтисосҳои молия, кори бонкӣ ва андозбандии донишгоҳ конфронси байналмилалӣ баргузор гардид. Дар ин хусус ба АМИТ «Ховар» дар ин донишгоҳ иттилоъ доданд.
Дар конфронси байналмилалӣ муовини ректори Донишгоҳи байналмилалии сайёҳӣ ва соҳибкории Тоҷикистон оид ба илм ва инноватсия Исломбек Зоирзода иброз намуд, ки такмили фаъолияти молиявӣ-қарзӣ ва низоми андозбандӣ яке аз ҳадафҳои муҳими Ҳукумати Ҷумҳурии Тоҷикистон мебошад. Дар солҳои Истиқлолияти давлатии Ҷумҳурии Тоҷикистон дар ҷумҳурӣ маҳз бо ташаббуси Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон низоми идоракунии устувори молиявӣ густариш ёфт.
Таъкид шуд, ки ҷаҳони муосир аз давлатҳои дар ҳолати гузариш қарордошта сатҳи баланди рушди иқтисодиёти миллӣ ва низоми молиявӣ талаб менамояд.
Дар конфронси байналмилалӣ кормандони масъули Сарраёсати буҷети давлатии Вазорати молияи Ҷумҳурии Тоҷикистон, олимону устодони Донишгоҳи байналмилалии сайёҳӣ ва соҳибкории Тоҷикистон, Донишгоҳи миллии таҳқиқотии «Донишкадаи энергетикии Москва», Донишгоҳи давлатии Лонг Бичи Калифорнияи Амрико ва дигарон тариқи ҳузурӣ ва маҷозӣ доир ба паҳлуҳои гуногуни рушди низоми молия ва низоми андозбандӣ ибрози назар намуданд.
Бояд тазаккур дод, ки шуруъ аз соли 2011 ҳамасола 7 декабр дар Ҷумҳурии Тоҷикистон Рӯзи кормандони молия ҳисобида мешавад.
АКС: Донишгоҳи байналмилалии сайёҳӣ ва соҳибкории Тоҷикистон