Хадамоти алоқа доир ба имконияти техникии операторони мобилӣ дар самти густариши ҳисоббаробаркунии ғайринақдӣ машварати илмӣ-тадқиқотӣ доир намуд

ДУШАНБЕ, 23.12.2023 /АМИТ «Ховар»/. Дар Душанбе бо ташаббуси Хадамоти алоқаи назди Ҳукумати Ҷумҳурии Тоҷикистон дар мавзуи «Муаррифии имконияти техникии операторони мобилӣ ҷиҳати истифодаи онҳо дар раванди татбиқи Фармони Президенти Ҷумҳурии Тоҷикистон «Дар бораи тадбирҳои вусъат додани ҳисоббаробаркунии ғайринақдӣ» бо иштироки намояндагони вазорату идораҳо ва муассисаҳои дахлдор машварати илмӣ-тадқиқотӣ баргузор шуд. Дар ин хусус ба АМИТ  «Ховар» дар Хадамоти алоқаи  назди Ҳукумати Ҷумҳурии Тоҷикистон хабар доданд.

Дар машварат намояндагони ҶДММ «Таком»,  ҶСП «Вавилон- мобайл», ҶСП «Индиго Тоҷикистон», ҶСП «ТТ Мобайл», ҶСК «Тоҷиктелеком» доир ба имконияти техникии операторони мобилӣ ҷиҳати истифодаи онҳо дар раванди татбиқи Фармони Президенти Ҷумҳурии Тоҷикистон «Дар бораи тадбирҳои вусъат додани ҳисоббаробаркунии ғайринақдӣ»  маълумот доданд.

Ҳадаф аз баргузории машварат табодули афкор ва таҷрибаи бештар дар заминаи густариши табдирҳо дар раванди гузариш ба ҳисоббаробаркунии ғайринақдӣ мебошад.

Дар фарҷом иштирокдорони ҷамъомад  дар  мавзуи мавриди назар  табодули афкор намуданд.

АКС: Хадамоти алоқаи назди Ҳукумати Ҷумҳурии Тоҷикистон