Ҳангоми суқути ҳавопаймо дар Афғонистон чор нафар зинда монданд

ДУШАНБЕ, 22.01.2024 /АМИТ «Ховар»/. Тибқи маълумоти пешакӣ, чор мусофири ҳавопаймои Falcon 10, ки аз радарҳо дар Афғонистон нопадид шуда буд, зиндаанд ва иттилоъ дар бораи ду нафари дигар мушаххас мешавад. Дар ин хусус дар хабари Агентии федералии нақлиёти ҳавоии Русия гуфта мешавад, иттилоъ медиҳад АМИТ «Ховар» бо истинод ба агентии иттилоотии ТАСС.

«Тибқи маълумоти Сафорати Русия дар Афғонистон, хадамоти ҷустуҷӯӣ ва наҷотдиҳии маҳаллӣ ҳавопаймои Falcon 10-ро пайдо намуд, ки аз шаш нафари дар дохили ҳавопаймо қарордошта чор нафар зиндаанд (онҳо ҷароҳатҳои гуногун бардоштаанд). Сарнавишти ду нафар мушаххас мешавад», — иттилоъ доданд дар Агентии федералии нақлиёти ҳавоии Русия.

«Гурӯҳи ҷустуҷӯӣ ва наҷотдиҳӣ ҳавопаймои Falcon 10-ро, ки шаби 20 январ аз радарҳо нопадид шуда буд, пайдо намуда, чор нафар, аз ҷумла халабони ҳавопаймо, зиндаанд», — омадааст дар хабар.

Азиза ИКРОМ,
АМИТ «Ховар»

АКС: AP Photo/ Darko Vojinovic, бойгонӣ