Дар Ҷоми Осиё-2023 нахустин маротиба намояндаи Тоҷикистон Гулмуроди Саъдулло доварӣ намуд

ДУШАНБЕ, 20.01.2024 /АМИТ «Ховар»/. Намояндаи Тоҷикистон, довари 33-солаи Федератсияи байналмилалии футбол (ФИФА) Гулмуроди Саъдулло нахустин маротиба ҳамчун довари асосӣ дар Ҷоми Осиё-2023 дар Қатар бозиро ҳакамӣ намуд, хабар медиҳад АМИТ «Ховар» бо истинод ба Федератсияи футболи Тоҷикистон.

Гулмуроди Саъдулло дар даври дуюми марҳилаи гурӯҳии Ҷоми Осиё бозии дастаҳои мунтахаби Ветнам ва Индонезияро дар чаҳоргонаи «D» ҳакамӣ намуд.

Ин бозӣ 19 январ дар варзишгоҳи Абдуллоҳ бин Халифаи Доҳа баргузор шуда, бо ҳисоби 1:0 ба фоидаи тими Индонезия анҷом ёфт. Дар ин бозӣ Гулмуроди Саъдулло чаҳор корти зард нишон дод: ду корт ба футболбозони Индонезия ва ду корти дигар ба бозигари ветнамӣ, ки аз майдон хориҷ шуд.

Ёдовар мешавем, ки қаблан дар Ҷоми Осиё-2023 дар Доҳа Гулмуроди Саъдулло дар бозии Индонезия – Ироқ (1:3) ба ҳайси довари эҳтиётӣ фаъолият намуд.

АКС: Федератсияи футболи Тоҷикистон