Дар шаҳри Бохтар тақсимоти таҷҳизоти таълимию технологӣ ба 80 муассисаи таълимӣ баргузор гардид

ДУШАНБЕ, 20.01.2024 /АМИТ «Ховар»/. Дар муассисаи таълимии рақами 16-и шаҳри Бохтар намоиш ва оғози тақсимоти таҷҳизоти таълимию технологӣ ба 80 муассисаи таълимии лоиҳавӣ баргузор гардид, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон.

Таъкид гардид, ки дар доираи сиёсати дарҳои кушод ва ҳамкории зичи Тоҷикистон бо шарикони рушд ҷиҳати беҳтар шудани шароити таълиму тарбия корҳои зиёду нафъовар анҷом дода мешаванд. Бахусус, дар ҳамкорӣ бо шарикони рушд, ки бо Вазорати маориф ва илм, инчунин Мақомоти иҷроияи ҳокимияти давлатии вилояти Хатлон амалӣ шудааст, ба 80 муассисаи таълимӣ кумакҳои гуногун, ба монанди компютер, тахтаи электронӣ, принтер ва дигар ҷиҳози хониш расонида мешаванд.

Лоиҳаи «Мактабҳои 2030» дар чанд марҳила амалӣ шуда, ба муассисаҳои таълимӣ кумаки зиёд мерасонад. Дар муассисаҳои лоиҳавӣ касбияти омӯзгорон ва шароити таълим беҳтар мешавад.

АКС: Мақомоти иҷроияи ҳокимияти давлатии вилояти Хатлон