РАВАНДИ ОБИ ДУШАНБЕ. Дар ҳошияи Конфронси сеюми байналмилалии сатҳи баланд дар Душанбе 5 муколамаи интерактивӣ* баргузор мегардад

ДУШАНБЕ, 11.01.2024 /АМИТ «Ховар»/. Лоиҳаи барномаи Конфронси сеюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028», ки моҳи июни соли 2024 дар шаҳри Душанбе доир мегардад, бо натиҷагирӣ аз барномаи Конфронси таърихии Созмони Милали Муттаҳид /СММ/ оид ба захираҳои об, ки моҳи марти соли 2023 дар Ню Йорк баргузор гардид, таҳия шудааст. Дар ин хусус АМИТ «Ховар» бо истинод ба ҷаласаи нахустини Кумитаи тадорокути Конференсияи сеюми байналмилалии сатҳи баланд оид ба «Даҳсолаи байналмилалии об барои рушди устувор, 2018-2028», ки 2 январи соли равон таҳти раёсати Сарвазири мамлакат Қоҳир Расулзода баргузор гардид, хабар медиҳад.

Лоиҳаи барномаи Конфронси сеюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» омода ва пешниҳод гардидааст. Барномаи Конфронси сеюми сатҳи баланд аз маросими ифтитоҳ ва пӯшидашавӣ, форумҳо, ҷаласаҳои пленарӣ ва муколамаҳои интерактивӣ* иборат аст. Дар ҳошияи Конфронси сеюми сатҳи баланд 5 муколамаи интерактивӣ: «Об барои саломатӣ: дастрасӣ ба оби нӯшокӣ, беҳдошт ва гигиена» (WASH)» — «ҳуқуқи инсон ба оби ошомиданӣ ва беҳдошт», «Об барои рушди устувор: арзиши об, робитаи об-энергия-ғизо ва рушди устувори иқтисодӣ ва шаҳрҳо», «Об барои иқлим, устуворӣ ва муҳити зист: аз манбаъ то баҳр, гуногунии биологӣ, иқлим, устуворӣ ва коҳиш додани хатари офатҳои табиӣ (DRR), «Об барои ҳамкорӣ: ҳамкории фаромарзӣ ва байналмилалӣ оид ба об, ҳамкории байнисоҳавӣ, аз ҷумла, ҳамкории илмӣ ва об дар саросари Рӯзномаи то соли 2030» ва «Даҳсолаи амал оид ба об: тақвият бахшидан ба табиқи ҳадафҳои Даҳсола, аз ҷумла дар доираи нақшаи амали Дабири кулли СММ» гузаронида мешаванд.

Бояд тазаккур дод, ки мавзуъҳои муколамаҳои интерактивии Конфронси сеюми сатҳи баланди Душанбе бо мавзуъҳои муколамаҳои Конфронси Ню Йорк ҳамном мебошанд. Дар панҷ муколамаи интерактивӣ созмонҳои байналмилалӣ ва давлатҳо, аз қабили Иттиҳоди Аврупо, Британияи Кабир, Доминикан, Чин, Ҷопон, Миср, Швейтсария, Сенегал ва Амрико ҳамраисӣ менамоянд.

Конфронси сеюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» дар доираи ташаббусҳои ҷаҳонии Президенти Ҷумҳурии Тоҷикистон муҳтарам Эмомалӣ Раҳмон дар масъалаи об ва иқлим дар пойтахти мамлакат гузаронида мешавад.

Марзия САИДЗОДА,
АМИТ «Ховар»

АКС аз манбаъҳои боз

______________

Интерактивӣ*- аз калимаи англисии interaction — “interactive” гирифта шуда, маънояш амали якҷоя, ҳамкорӣ, муколама, табодули ҳамзамон мебошад. Ин мафҳум хусусият ва дараҷаи таъсири мутақобилаи байни объектҳо ё субъектҳоро ошкор намуда, дар ҷаласаҳои сатҳи баланд, назарияи иттилоот, илмҳои компютерӣ ва барномасозӣ, системаҳои телекоммуникатсионӣ, ҷомеашиносӣ, тарроҳӣ, махсусан тарҳрезии мутақобила ва ғайра истифода мешавад.

Он низоми тақсими вақт барои ҳамзамон ё якбора гузаронидани якчанд ҷаласа ва ё барномаҳоро ифода менамояд.

Унсурҳои интерактивӣ ҳама унсурҳои низоми мутақобила мебошанд, ки тавассути онҳо ҳамкорӣ бо дигаре доир мешавад.