Ҳайати энергетикҳои Қирғизистон бо иншооти азим- Неругоҳи барқи обии «Роғун» шинос гардид

ДУШАНБЕ, 17.02.2024 /АМИТ «Ховар»/. 16 феврал ҳайати энергетикҳои Ҷумҳурии Қирғизистон таҳти роҳбарии Вазири энергетика Таалайбек Ибраев дар доираи сафари омўзишӣ ба Ҷумҳурии Тоҷикистон бо рафти сохтмони иншооти азми аср- Неругоҳи барқи обии «Роғун» шинос шуд. Дар ин хусус ба АМИТ «Ховар» дар Неругоҳи барқи обии «Роғун» хабар доданд.

Ҳайати мазкур аз роҳбарон ва мутахассисони корхонаҳои энергетикии Ҷумҳурии Қирғизистон иборат мебошад.

Ҳайати меҳмононро дар Неругоҳи барқи обии «Роғун» роҳбарону мутахассисони масъул бо лоиҳаи беназири неругоҳ тавассути видеофилми ҳуҷҷатӣ муаррифӣ намуданд.

Энергетикҳои Қирғизистон бо ҷараёни сохтмон ва кору фаъолияти сохтмончиёни  тоҷик дар ин ишооти азими аср  аз наздик шинос шуданд. Онҳо бо иншооти асосии неругоҳ,  аз қабили нақби сохтмонии қабати чаҳорум (СТ-4) ва мавзеи Сарбанди хокию сангии баландтарин дар ҷаҳон, ки бо қомати 335 метр аз сатҳи баҳр бунёд хоҳад шуд, шинос гардиданд.

Меҳмонон ҳамчунин бо бунёди обқабулкунаки асосии неругоҳ, ки дар тарози 1172 метр аз сатҳи баҳр амалӣ мешавад, нақбҳои обрасону ҳавокаш, иншооти толори мошинҳову бинои тарнсформаторҳо, нақбҳои нақлиётиву дастрасӣ, намои соҳилҳову обанбори тозабунёд, тирози Ядрои Сарбанд ва тароши куҳҳои паҳлӯӣ шинос шуданд.

Ҳайати Қирғизистон дар фарҷом ба китоби «Роғун — Кохи Нур» таассуроти худро дарҷ намуданд.

АКС: Неругоҳи барқи обии «Роғун»