НАМУНАИ ИБРАТ! Дар замини назди бинои Мақомоти иҷроияи ҳокимияти давлатии ноҳияи Ҷайҳун 8 ҳазор қаламчаи гули садбарг шинонида шуда, боғи зардолу ва шафтолу бунёд гардидааст

Март 16, 2024 11:31

ДУШАНБЕ, 16.03.2024. /АМИТ «Ховар»/. Имсол дар замини назди бинои Мақомоти иҷроияи ҳокимияти давлатии ноҳияи Ҷайҳун 8 ҳазор қаламчаи гули садбарг ва дар 0, 2 сотих картошка шинонида шудааст. Дар як тарафи ин замин зиёда аз 30 бех дарахти зардолую шафтолу ғарқи гул буда, дар тарафи дигари он боғи нави зардолу бунёд гардидааст, иттилоъ медиҳад хабарнигори АМИТ «Ховар».

Раиси ноҳия Абдулҳафиз Одиназода дар суҳбат бо мухбири АМИТ «Ховар» иброз дошт, ки кормандони Мақомоти иҷроияи ҳокимияти давлатии ноҳияи Ҷайҳун чандин сол аст, ки дар замини назди бинои мақомот маҳсулоти гуногуни кишоварзӣ парвариш намуда, ҳамчунин боғ бунёд карда, ҳосили онро барои таъмини хонаводаи худ ва захира намудан барои зимистон истифода мебаранд.

«Мақсади асосии мо аз ин амал на танҳо таъмини кормандон бо маҳсулоти кишоварзӣ, балки дар навбати аввал барои сокинон ва роҳбарони дигар ташкилоту муассисаҳо дар оқилона истифода бурдани ҳар порча замин намуна будан мебошад. Агар дар утоқҳои кории кормандони мақомот мушоҳида карда бошед, онҳо дар парвариши гулҳои хонагӣ ҳам мехоҳанд барои сокинони ноҳия намунаи ибрат бошанд. Тибқи дастуру супоришҳои Сарвари давлат муҳтарам Эмомалӣ Раҳмон кормандони мақомот талош доранд, ки дар сабзгардонии муҳити зист ва тарбияи завқи зебоипарастии сокинон низ саҳм гузоранд», — илова кард номбура.

Раиси ноҳия хотиррасон намуд, ки роҳбарони ташкилоту муассисаҳои ноҳия новобаста аз шакли фаъолияташон таъкид гардидаанд, ки ҳар порча замини назди биноҳоро оқилона ва самаранок истифода баранд.

Дар ҳақиқат, тавре мушоҳида гардид, ҳар порча замини назди корхонаю муассисаҳо ва манзилҳои зисти сокинони ин ноҳия сабзу хуррам гардонида шуда, ба ғайр аз гулу буттаҳои ороишӣ ва дарахтони меваю сояафкан, инчунин дар ин ҷо маҳсулоти кишоварзӣ, аз қабили пиёз, картошка, қаламфури булғорӣ ва дигар сабзавот парвариш карда мешаванд.

Абдулҳафиз Одиназода изҳор дошт, ки сокинони ноҳияи Ҷайҳун дар миқёси ҷумҳурӣ ҳамчун деҳқонону боғдорони асил ном бароварда, натиҷаи заҳмати шабонарӯзии онҳо буд, ки нишондодҳои иҷтимоию иқтисодии ноҳия дар соли гузашта хуб ҷамъбаст гардид. Имсол кишоварзони ноҳия мақсад гузоштаанд, ки баҳри иҷрои дастуру супоришҳои Президенти мамлакат муҳтарам Эмомалӣ Раҳмон дар мавриди аз як замин рӯёндани ду – се ҳосил тадбирҳои зарурӣ андешида, талош доранд, ба бозорҳои мамлакат маҳсулоти хушсифати кишоварзӣ, алалхусус пиёзи барвақтӣ бароварда, дар таъмини амнияти озуқавории мамлакат саҳми арзанда гузоранд. Дар айни замон дар баъзе хоҷагиҳои деҳқонии ноҳияи Ҷайҳун ҷамъоварии сабзӣ идома дошта, ин маҳсулот бо нархи арзон ба бозорҳои ҷумҳурӣ ба фурӯш бароварда мешавад.


Дар доираи тадбирҳои ободониву созандагӣ ба ифтихори ҷашни 35-солагии Истиқлолияти давлатии Ҷумҳурии Тоҷикистон ва мавсими ниҳолшинонӣ дар ноҳияи Ҷайҳун 80 ҳазор бех ниҳоли дарахтони сояафкан, ороишӣ ва ҳамешасабз шинонида шудааст.

Ёдовар мешавем, ки ба истиқболи 35-солагии Истиқлоли давлатии Ҷумҳурии Тоҷикистон дар ноҳияи Ҷайҳун сохтмони 504 иншооти таъйиноти гуногун ба нақша гирифта шудааст.

Рухсораи НУР,
АМИТ «Ховар»

АКС: АМИТ «Ховар»

Март 16, 2024 11:31

Хабарҳои дигари ин бахш

Бонки аврупоии таҷдид ва рушд дар Хатлон пойгоҳҳои обкаширо навсозӣ менамояд
Масъалаҳои рушди ҳамкории иқтисодию тиҷоратӣ байни Тоҷикистон ва Покистон баррасӣ шуданд
Дар Душанбе ҷаласаи сатҳи байналмилалӣ оид ба омори меҳнат оғоз гардид
«САНОАТИКУНОНӢ ДАР МАСИРИ РУШД». Таҳти чунин унвон дар Суғд конфронси илмӣ-амалии ҷумҳуриявӣ баргузор шуд
«БАРҚИКУНОНИИ ДЕҲОТИ ТОҶИКИСТОН». Дар марҳилаи аввали татбиқи лоиҳа сокинони 26 маҳаллаи Бадахшон ба неруи барқ дастрасӣ пайдо намуданд
Дар Тоҷикистон ҷаласаи 42-юми Ситоди тафтишоти муштарак оид ба вайронкунии қонунгузории зиддиинҳисорӣ доир мешавад
«РОҲ БА СӮИ ТИЁН-ШОН». Муҳимтарин масъалаҳои марбут ба роҳу нақлиёт дар конфронси байналмилалӣ баррасӣ шуданд
Тоҷикистон ва Туркия ҳамкориро дар соҳаҳои энергияи «сабз» ва саноати кӯҳӣ тақвият медиҳанд
Ҳайатҳои Тоҷикистон ва Туркия дар ҳошияи ҷаласаи Комиссияи байниҳукуматӣ масъалаҳои мубрами ҳамкориро баррасӣ намуданд
Дар Анқара ҷаласаи 12-уми Комиссияи байниҳукуматии Тоҷикистон ва Туркия оид ба ҳамкории иқтисодӣ доир гардид
Вазири рушди иқтисод ва савдои Тоҷикистон бо Раиси Шурои мунисипалии шаҳри Чэндуи Чин мулоқот намуд
Дар вилояти Хатлон масъалаи содироти маҳсулоти кишоварзӣ ба хориҷи мамлакат баррасӣ шуд