Наврӯз ба унвони аввалин рӯзи офариниши табиат ёдгор аз таърихи куҳани мардуми тоҷик аст

ДУШАНБЕ, 27.03.2024 /АМИТ «Ховар»/. Ба ифтихори ҷашни Наврӯз дар Палатаи ҳисоби Ҷумҳурии Тоҷикистон таҳти унвони «Наврӯзи хуҷаста» ҳамоиши фарҳангӣ баргузор шуд, хабар медиҳад АМИТ «Ховар» бо истинод ба Палатаи ҳисоб.

Аз ҷониби занони ҳунарманду соҳибистеъдод дастархони ҷашнӣ тибқи расму оини миллӣ, таомҳои миллӣ ва ҳунару анъанаҳои ниёгонамон ороста шуд.

Раиси Палатаи ҳисоби Қарахон Чиллазода иброз дошт, ки «маҳз дар замони Истиқлолияти давлатӣ ва бо ибтикори Президенти Ҷумҳурии Тоҷикистон муҳтарам Эмомалӣ Раҳмон мо ба ин рӯзҳои нек расидем, ҷашнҳои миллии мо аз нав эҳё гардида, ҷашни Наврӯз  мақоми байналмилалӣ пайдо намуд».

Гуфта шуд, ки ин ҷашни фархунда дар замони Истиқлоли давлатӣ чун унсури ҳувиятсоз дар бедорӣ ва баланд бардоштани эҳсоси худшиносии ҷомеа нақши муассир дорад. Наврӯз аз шукуҳмандтарин ҷашнҳои миллӣ аст, ки бо фаро расиданаш фазои рӯзгори мардуми фарҳангпарвари мо пур аз шодмонию сурур мегардад. Наврӯз ба унвони аввалин рӯзи офариниши табиат ёдгоре аз таърихи куҳани мардуми тоҷик  маҳсуб мешавад.

Ин ҷашни бостон дар рӯзгори мо, пеш аз ҳама, рамзи бақои зиндагӣ, зебоӣ ва ҷавонии оламу одам аст.

АКС: Палатаи ҳисоби Ҷумҳурии Тоҷикистон