8 АПРЕЛ-РӮЗИ ИҚТИСОДЧИЁН. Созмонҳои бонуфузи байналмилалии молиявӣ Тоҷикистонро давлати дорои суръати баланди рушди иқтисодӣ арзёбӣ намудаанд

Апрель 8, 2024 11:54

ДУШАНБЕ, 08.04.2024 /АМИТ «Ховар»/. Созмонҳои бонуфузи  байналмилалии молиявӣ Тоҷикистонро давлати дорои суръати баланди рушди иқтисодӣ арзёбӣ намудаанд. Чунин гуфт Вазири рушди иқтисод ва савдои Ҷумҳурии Тоҷикистон Завқӣ Завқизода дар ҷамъомади тантанавӣ, ки имрӯз дар  вазорат бахшида  ба Рӯзи иқтисодчиён  баргузор гардид. Дар ин хусус АМИТ «Ховар» бо истинод ба Вазорати рушди иқтисод ва савдои Тоҷикистон  иттилоъ медиҳад.

Бояд гуфт, ки дар асоси Қонуни Ҷумҳурии Тоҷикистон «Дар бораи рӯзҳои ид» ҳар сол дар мамлакат 8 апрел Рӯзи иқтисодчиён ҷашн гирифта мешавад.

Вазири рушди иқтисод ва савдо Завқӣ Завқизода иқтисодчиёни мамлакат ва кормандони вазоратро бо ҷашни касбӣ шодбош гуфта, иброз намуд, ки таҳти сиёсати Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иқтисодчиён дар ҳалли масъалаҳои муҳими иқтисодию иҷтимоии мамлакат, таъмини рушди устувори иқтисодӣ ва дар ин замина баланд бардоштани сатҳи зиндагии мардум саҳми муносиб мегузоранд.

Таъкид шуд, ки дар бисту се соли охир новобаста аз омилҳои берунӣ рушди иқтисоди  ҷумҳурӣ ҳамасола ба ҳисоби миёна дар сатҳи 7,7 фоиз таъмин гардида, маҷмуи маҳсулоти дохилӣ аз 1,8 миллиард сомонии соли 2000 то ба 130,8 миллиард сомонӣ дар соли 2023 ва даромадҳои пули аҳолӣ аз 1 миллиард то 113 миллиард сомонӣ ё 113 маротиба афзоиш ёфтаанд. Аз ҷумла, рушди иқтисоди мамлакат  соли 2023-юм 8,3 фоизро ташкил дод, ки асосан аз ҳисоби зиёд гардидани ҳаҷми истеҳсоли маҳсулоти саноатӣ ба андозаи 12 фоиз, кишоварзӣ-9 фоиз, маблағгузорӣ ба сармояи асосӣ-22,5 фоиз, боркашонӣ-16,6 фоиз, хизматрасонии пулакӣ-14,1 фоиз, гардиши савдо-13,4 фоиз ва мусофиркашонӣ 9,8 фоиз таъмин гардид.

Имрӯзҳо кормандони Вазорати рушди иқтисод ва савдои мамлакат ин гуфтаи Президенти Ҷумҳурии Тоҷикистон муҳтарам Эмомалӣ Раҳмонро, ки зимни пешниҳоди Паём ба Маҷлиси Олӣ 28 декабри соли 2023 баён дошта буданд, сармашқи кор қарор додаанд: «Ҳадафи олии давлат ва Ҳукумати мамлакат таъмин намудани рушди устувори иқтисодии мамлакат тавассути баланд бардоштани самаранокии истифодаи захираву имконияти мавҷуда, дарёфти манбаъҳои нави рушд, тараққӣ додани соҳаҳои илму маориф, тандурустӣ, инкишофи неруи инсонӣ ва бо ҳамин роҳ мунтазам беҳтар намудани сатҳу сифати зиндагии мардуми шарифи Тоҷикистон мебошад».

Дар амал татбиқ намудани барномаҳои рушди иқтисодию иҷтимоии ҷумҳурӣ ва барномаҳои соҳавию минтақавӣ имконият дод, ки рушди бонизоми иқтисоди миллӣ идома ёфта, раванди ислоҳоти иқтисодии рушди устувори давлат ва ҳадафҳои Ҳукумат баҳри беҳдошти ҳаёти мардум таъмин гардад. Имрӯзҳо дар ҷумҳурӣ дар самти рушди иқтисоди миллӣ 27 стратегия, 11 консепсия, 94 барномаи соҳавӣ ва 68 барномаи минтақавӣ татбиқ мешавад, ки ба рушди иҷтимоию иқтисодии ҷумҳурӣ замина мегузоранд.

Татбиқи сиёсати пешгирифтаи Ҳукумати Ҷумҳурии Тоҷикистон давоми солҳои соҳибистиқлолӣ дар соҳаи саноат имкон дод, ки вобастагии иқтисоди мамлакат аз маҳсулоти воридотӣ, бахусус семент, ангишт, масолеҳи сохтмонӣ ва маводи хӯрокворӣ кам гардад ва барои содироти минбаъдаи маҳсулоти саноатии ватанӣ замина фароҳам оварда шавад.

Вазорати рушди иқтисод ва савдо дар доираи ҳадафҳои муайяннамудаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Барномаи  миёнамуҳлати рушди Ҷумҳурии Тоҷикистон барои солҳои 2021-2025», «Барномаи давлатии рушди содироти Ҷумҳурии Тоҷикистон барои солҳои 2021-2025», «Барномаи миёнамуҳлати иқтисоди рақамии Ҷумҳурии Тоҷикистон барои солҳои 2021-2025», «Стратегияи рушди зеҳни сунъӣ дар Ҷумҳурии Тоҷикистон барои давраи то соли 2040» ва «Стратегияи рушди иқтисоди «сабз» дар Ҷумҳурии Тоҷикистон барои солҳои 2023-2037»-ро таҳия намудааст, ки ин барномаҳою стратегияҳо дар рушди устувори иқтисоди миллӣ заминаи мусоид фароҳам меоранд.

Дар анҷоми ҷамъомади тантанавӣ кормандони фаъоли Вазорати рушди иқтисод ва савдои Ҷумҳурии Тоҷикистон барои хизматҳои арзанда бо Ифтихорнома сарфароз гардонида шуданд.

    АКС: Вазорати рушди иқтисод ва савдои Ҷумҳурии Тоҷикистон

Апрель 8, 2024 11:54

Хабарҳои дигари ин бахш

Доираҳои соҳибкории Тоҷикистон ва Туркия дар Анқара тақвияти ҳамкориро баррасӣ намуданд
Ба пойгоҳи обкашии «Янтоқ -1»-и ноҳияи Мастчоҳ ду агрегати нав дастрас гардид
Ширкати Чин дар Минтақаи озоди иқтисодии «Панҷ» зеристгоҳи барқии офтобӣ месозад
Дар Душанбе дурнамои ҳамкории Бонки миллии Тоҷикистон бо Корпоратсияи байналмилалии молиявӣ баррасӣ шуд
Аз ноҳияи Ашт 3000 тонна зардолуи пешпазак содирот мешавад
Дар вилояти Хатлон масоили иқтисодиву сармоягузорӣ баррасӣ шуданд
Бонки аврупоии таҷдид ва рушд дар Хатлон пойгоҳҳои обкаширо навсозӣ менамояд
Масъалаҳои рушди ҳамкории иқтисодию тиҷоратӣ байни Тоҷикистон ва Покистон баррасӣ шуданд
Дар Душанбе ҷаласаи сатҳи байналмилалӣ оид ба омори меҳнат оғоз гардид
«САНОАТИКУНОНӢ ДАР МАСИРИ РУШД». Таҳти чунин унвон дар Суғд конфронси илмӣ-амалии ҷумҳуриявӣ баргузор шуд
«БАРҚИКУНОНИИ ДЕҲОТИ ТОҶИКИСТОН». Дар марҳилаи аввали татбиқи лоиҳа сокинони 26 маҳаллаи Бадахшон ба неруи барқ дастрасӣ пайдо намуданд
Дар Тоҷикистон ҷаласаи 42-юми Ситоди тафтишоти муштарак оид ба вайронкунии қонунгузории зиддиинҳисорӣ доир мешавад