Ҳайати парлумонии Гурҷистон бо Осорхонаи миллии Тоҷикистон шинос гардид

ДУШАНБЕ, 01.04.2024 /АМИТ «Ховар»/. Дар доираи сафари корӣ ҳайати парлумонии  Гурҷистон таҳти роҳбарии раиси кумита оид ба муносибатҳои байналмилалии Парлумони  Гурҷистон Николоз Самхарадзе бо Осорхонаи миллии Тоҷикистон шинос гардид.

Ба АМИТ «Ховар» сардори шуъбаи методӣ ва тайёр намудани кадрҳои илмии  Осорхонаи миллӣ Алишер Зарипов иттилоъ дод, ки барои  ҳайати парлумонии Гурҷистон сайри осорхонавӣ  ташкил шуд.

Меҳмонон  дар толорҳои намоишии «Асри санг», «Асри биринҷ», «Кулолгарӣ», «Ҳахоманишиҳо», «Сиккаҳо», «Кушониён», «Панҷакенти қадим», «Мероси хаттӣ», «Аҷинатеппа» ва толори «Туҳфаҳои Президенти Ҷумҳурии Тоҷикистон» бо таърихи пурғановати миллати тоҷик, фарҳанги бою рангин ва шоҳкориҳои нодир, ки аз ҷониби ниёгонамон офарида шуда, инъикосгари фарҳанги миллати тоҷик давоми таърихи бостонӣ ҳастанд, шинос гардиданд.

Дар анҷом ҳайати парлумонии Гурҷистон таассуроташро дар китоби «Меҳмонони фахрӣ»-и Осорхонаи миллӣ дарҷ намуд.

АКС: Осорхонаи миллии Тоҷикистон