«БО ҲАМ». Дар Осорхонаи миллӣ намоиши асарҳои рассомони муосири тоҷик оғоз шуд

ДУШАНБЕ, 30.04.2024 /АМИТ «Ховар»/. Беш аз 50 мусаввараи беҳтарини рассомони муосири тоҷик дар намоиш таҳти унвони «Бо ҳам» дар Осорхонаи миллии Тоҷикистон ба маърази тамошо гузошта шуд, иттилоъ дод ба АМИТ «Ховар» сардори шуъбаи методӣ ва омода намудани кадрҳои илмии Осорхонаи миллии Тоҷикистон Алишер Зарипов.

Зимни ифтитоҳи намоиш директори Осорхонаи миллии Тоҷикистон Зафаршо Иброҳимзода доир ба нақши Осорхонаи миллӣ дар самти баргузории намоиши асарҳои офаридаи рассомони тоҷик ва муаррифии мероси таърихию фарҳангии халқи тоҷик сухан гуфт.

Дар намоиши мусаввараҳои беҳтарини рассомони муосири тоҷик «Бо ҳам» зиёда аз 50 асари рассомони Тоҷикистон, аз ҷумла офаридаҳои Баҳром Исматов «Аз паси орзуҳо», «Оҳанги баҳор», «Мевафурӯш», «Духтарак бо себ», «Оҳанг», Умед Аҳмадов «Гулҳои Душанбе», «Бонуи тоҷик», «Оила», «Дар интизорӣ», «Рӯзи офтобӣ», Илёс Мамадҷонов «Нирвана», «Бухоро», «Анъана», «Оҳанги дил», «Хомӯшӣ» ва дигар асарҳо ба маърази тамошо гузошта шудаанд.

Асарҳои рассомони муосири тоҷик бо услуби ҷадид ва воқеънигорӣ офарида шуда, дар онҳо ёдгориҳои таърихӣ, манзараҳои зебои табиати Тоҷикистон, ҳаёти осоиштаи мардум, расму оин ва анъанаҳои миллии тоҷикон таҷассум ёфтаанд.

Баргузории чунин намоиши осорхонавӣ имкон медиҳад, то қишрҳои гуногуни ҷомеа бо эҷодиёти рассомони муосири Тоҷикистон аз наздик шинос шаванд, ҳамзамон дар замири онҳо ҳисси баланди миллӣ, зебоипарастӣ ва арҷгузорӣ нисбат ба арзишҳои фарҳангӣ бедор гардад.

Намоиши асарҳои рассомони муосири тоҷик «Бо ҳам» то 8 май идома меёбад.

АКС: Осорхонаи миллии Тоҷикистон