МАСЪУЛИЯТИ ВОЛИДАЙН. Дар ин мавзуъ мулоқоти роҳбарияти милитсияи пойтахт бо соҳибкорони «Бозори Фаровон»-и шаҳри Душанбе доир шуд

Апрель 1, 2024 16:06

ДУШАНБЕ, 01.04.2024 /АМИТ «Ховар»/. Пеш аз ҳама, аз соҳибкорону масъулини «Бозори Фаровон»-и шаҳри Душанбе, ки калонтарин маҷмааи савдо дар пойтахти мамлакат маҳсуб мешавад, тақозо гардид, ки аз баланд бардоштани нархи маҳсулот худдорӣ кунанд. Тавре ба ҳамагон маълум аст, солҳои охир аз ҷониби баъзе савдогарон дар арафаи иду айём бе ягон асос баланд бардоштани нархи маҳсулот ба мушоҳида мерасад, ки ин боиси норозигии сокинони пойтахт мегардад. Дар ин хусус зимни мулоқоти муовини Раиси шаҳри Душанбе Абдураҳмон Абдураҳмонзода, сардори Раёсати Вазорати корҳои дохилӣ дар шаҳри Душанбе Бароталӣ Ҳамидзода ва сардори шуъбаи Вазорати корҳои дохилӣ -1 дар ноҳияи Сино Илҳом Файзуллозода бо маъмурият ва беш аз 400 нафар тоҷирону соҳибмулкони нуқтаҳои савдои «Бозори Фаровон»-и пойтахт, ки 30 марти соли равон доир гардид, иттилоъ дода шуд.

Тибқи иттилои манбаъ, мулоқоти мазкур ва силсила вохӯриҳо бо сокинони пойтахт дар асоси нақшаи чорабиниҳои Вазорати корҳои дохилӣ ва дастуру супоришҳои Раиси шаҳри Душанбе муҳтарам Рустами Эмомалӣ баргузор гардида, дар онҳо масъалаҳои доғи рӯз, аз қабили риояи ҳатмии талаботи қонунҳои амалкунанда, роҳнамоии сокинон дар самти пешгирии хурофоту бегонапарастӣ, ҳушёр будан дар замони бархӯрди фарҳангу тамаддунҳо, пешгирӣ аз таассубкориву зиёдаравӣ, муборизаи дастаҷамъӣ бо зуҳуроти номатлуб, пешгирии шомилшавии ҷавонон ба гурӯҳҳои ифротӣ, танзими нарху наво дар бозорҳо ва таъмини волоияти қонун мавриди баррасӣ қарор гирифтанд.
Сардори Раёсати Вазорати корҳои дохилӣ дар шаҳри Душанбе Бароталӣ Ҳамидзода дар мулоқот оид ба ҷараёни татбиқи қонунҳои Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ва «Дар бораи масъулияти падару модар дар таълиму тарбияи фарзанд» ибрози андеша намуда, аз ҳозирин риояи ҳатмии муқаррароти ин қонунҳоро талаб намуд.

Муовини Раиси шаҳри Душанбе Абдураҳмон Абдураҳмонзода аз фурӯшандагону соҳибкорон, ки онҳо ҳамзамон волидайн мебошанду масъулияти таълиму тарбияи дурусти фарзандро ба дӯш доранд, тақозо намуд, ки фориғболӣ накарда, аз кору рафтори фарзандони худ, бо кӣ дӯстӣ доштанашон, вақти худро дар куҷо сарф карданашон ва рафти таҳсилашон дар мактабу донишгоҳ ҳамеша огоҳ бошанду онҳоро ба роҳи рости зиндагӣ ҳидоят намоянд.

Ҳамзамон дар Муассисаи таҳсилоти миёнаи умумии №116-и ноҳияи Сино бо фаъону сокинони маҳаллаҳои Ҷӯйбодом, Конститутсия, Чортути Боло, Арбобхотун низ чунин вохурӣ гузаронида шуд.

Кормандони мақомоти ҳифзи ҳуқуқ оид ба дарёфти роҳҳои муборизаи дастаҷамъона бар зидди ҳама гуна зуҳуроти номатлуби зидди ҷамъиятӣ, баланд бардоштани маърифати ҳуқуқии шаҳрвандон, ҷалби ҷавонони синни даъватӣ ба сафи Қувваҳои Мусаллаҳ, таъмини волоияти қонун, пешгирии ҷинояткорӣ байни ноболиғон ва хонандагони мактабҳо, хотима бахшидан ба бегонапарастӣ, амалӣ намудани корҳои созандагию бунёдкорӣ, таблиғу ташвиқи моҳияти ҳифзи Истиқлолияти давлатӣ, таъмини ваҳдати миллӣ ва бо ҳамин роҳ саҳм гузоштан дар суботи ҷомеа ва рушди Ватан изҳори андеша намуданд.

Таъкид гардид, ки дар руҳияи хештаншиносиву ватандорӣ ва эҳтиром ба арзишҳои миллӣ таълиму тарбия намудани насли наврасу ҷавон аз ҳамагон масъулияти ҷиддӣ талаб мекунад.

«Танҳо дар ҳолати дуруст тарбия намудани фарзандон мо метавонем изҳори қаноатмандӣ намоем, ки рисолати худро хуб ба ҷо овардаем», -гуфта шуд дар мулоқот.

АКС: Раёсати Вазорати корҳои дохилӣ дар шаҳри Душанбе

Апрель 1, 2024 16:06

Хабарҳои дигари ин бахш

Вазорати мудофиа: «Дар ҳамаи шаҳру ноҳияҳои Тоҷикистон чорабиниҳои пешаздаъватӣ доир карда мешаванд»
Фестивали ҷумҳуриявии афсарону сарбозон «Муҳофизони Ватан» баргузор мешавад
Намояндагони Тоҷикистон дар конфронси 10-уми минтақавии Ассотсиатсияи байналмилалии прокуророни генералӣ иштирок доранд
Соҳибкороне, ки худсарона нархи маҳсулоти хӯрокаро боло мебардоранд, ҷарима карда мешаванд
МАВСИМИ ОББОЗӢ ФАРО РАСИД. Волидайн фарзандони худро ҳангоми оббозӣ беназорат нагузоранд!
Котиби Шурои амнияти Тоҷикистон Юсуф Раҳмон бо Котиби давлатии Шурои амнияти Ҷумҳурии Беларус Александр Волфович мулоқот намуд
Котиби Шурои амнияти Тоҷикистон бо Мушовири Шурои амнияти миллии Ҷумҳурии Ироқ мулоқот намуд
Дар вилояти Хатлон 128 ҳодисаи садамавии роҳу нақлиёт ба қайд гирифта шуд
Дар ҷаласаи Шурои вазирони мудофиаи давлатҳои аъзои СААД ҳамкорӣ дар соҳаи ҳарбӣ баррасӣ карда шуд
Котиби Шурои амнияти Тоҷикистон дар Вохӯрии 13-уми байналмилалии намояндагони баландмақоми бахши амният иштирок намуд
Аз 29 то 31 май дар Душанбе ҳаракати воситаҳои нақлиёт муваққатан маҳдуд карда мешавад
«ЗАМИН», «МАРЗ» ВА «ВАТАН» — УНСУРҲОИ МУҚАДДАС ВА ҲАЁТАН МУҲИМ. Ба Рӯзи Қӯшунҳои сарҳадӣ бахшида мешавад