ОГОҲӢ! Кумитаи ҳолатҳои фавқулода ва мудофиаи гражданӣ аз омадани сел дар минтақаҳои ҷудогонаи мамлакат ҳушдор медиҳад

ДУШАНБЕ, 12.04.2024 /АМИТ «Ховар»/. Тибқи маълумоти Агентии обуҳавошиносии Ҷумҳурии Тоҷикистон, 12-13 апрел дар якчанд ноҳияҳои кӯҳии ҷумҳурӣ ва навоҳии ғарбии Вилояти Мухтори Кӯҳистони Бадахшон омадани сел эҳтимол дорад. Дар робита ба ин Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба таваҷҷуҳи шаҳрвандон ва меҳмонони мамлакат мерасонад, ки дар ин рӯзҳо эҳтиёткор бошанд. Дар ин хусус АМИТ «Ховар» бо истинод ба ин кумита хабар медиҳад.

Бар асари ҳавои номусоид сатҳи об дар рӯдхонаҳои кӯҳӣ ва наздикӯҳӣ баланд мешавад. Инчунин сангрезиш ва лағжиши тарма дар роҳҳои кӯҳӣ аз эҳтимол дур нест.

Кумита бори дигар аз сокинон хоҳиш менамояд, ки дар ин рӯзҳо аз сафарҳои безарурат ба минтақаҳое, ки эҳтимоли лағжиши тарма ва регу санг доранд, худдорӣ намоянд. Рафтан ба доманакӯҳҳо барои ғунучини гиёҳҳо, ҳезум, шикор ва ба соҳили обҳо барои моҳидорӣ маслиҳат дода намешавад.

Сокинон бояд каналу ҷӯйбор ва селроҳаҳои назди манзили зисташонро сари вақт тоза кунанд.
Кумитаи ҳолатҳои фавқулода ба ронандагон ёдрас менамояд, ки ҳангоми ҳаракат дар роҳҳои кӯҳӣ қоидаҳои бехатариро ҷиддӣ риоя кунанд.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон