Дар Анқара Форуми соҳибкории Тоҷикистон ва Туркия доир мегардад

ДУШАНБЕ, 28.05.2024 /АМИТ «Ховар»/. Имрӯз дар шаҳри Анқара дар ҳошияи ҷаласаи 12-уми Комиссияи байниҳукуматии Тоҷикистон ва Туркия оид ба ҳамкории иқтисодӣ Форуми тиҷоратии Тоҷикистон ва Туркия баргузор мегардад, хабар медиҳад АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Туркия.

Дар форум намояндагони беш аз 200 ширкату корхонаҳои соҳаҳои гуногуни Тоҷикистон ва Туркия, ки дар соҳаҳои саноати маъдан, фармасевтӣ, нассоҷӣ, бахши молияву бонкдорӣ, логистикӣ, кишоварзӣ фаъолият доранд, инчунин намояндагони вазорату идораҳои марбутаи ҳарду давлат иштирок менамоянд.

Ҳамзамон дар доираи форум вохӯрии соҳибкорони Тоҷикистон ва Туркия дар қолаби «Соҳибкор бо соҳибкор» (B2B) доир гардида, дар ҷараёни он санадҳои ҳамкорӣ ба имзо мерасанд.

АКС: Сафорати Ҷумҳурии Тоҷикистон дар Ҷумҳурии Туркия