СОЛҲОИ РУШДИ САНОАТ. Дар Донишгоҳи технологии Тоҷикистон барои рушди саноати хӯрокворӣ лоиҳаи нав амалӣ мешавад

ДУШАНБЕ, 13.05.2024. /АМИТ «Ховар»/. Бахшида ба Солҳои рушди саноат (2022-2026), инчунин дар ин замина баланд бардоштани сатҳи тахассуси устодону донишҷӯён дар Донишгоҳи технологии Тоҷикистон ҷаласаи якуми лоиҳаи Барномаи Эрасмус+ Иттиҳоди Аврупо «OFINU – Донишгоҳи кушоди инноватсияҳо дар озуқаворӣ» дар Осиёи Марказӣ баргузор гардид. Дар ин хусус ба АМИТ «Ховар» дар Донишгоҳи технологии Тоҷикистон хабар доданд.

Меҳмонони ҷаласа аз Донишгоҳи илмҳои ҳаётӣ ва технологияҳои Латвия (LBTU), Донишгоҳи аграрии Словакия дар шаҳри Нитра, Донишкадаи кишоварзӣ ва агротехнологияи Андиҷон, Донишкадаи агроинноватсия ва таҳқиқоти шаҳри Самарқанд, Донишкадаи технология ва менеҷменти инноватсионӣ дар шаҳри Кӯлоб, Филиали Донишгоҳи технологии Тоҷикистон дар шаҳри Исфара буданд.

Тавзеҳ дода шуд, ки имрӯз дар донишгоҳ зиёда аз 400  устоди соҳибтахассус фаъолият дошта, дар 8 факултет ва 20 кафедра мутахассисони рақобатпазири бозори меҳнат аз рӯйи 43 ихтисос дар зинаи бакалавр, 36 ихтисос дар зинаи магистратура ва 8 самти илмии  докторантура аз рўи ихтисоси PhD мутахассис тайёр мекунад. Иброз гардид, ки барои ҳимояи рисолаҳои илмӣ дар донишгоҳ Шурои диссертатсионӣ оид ба ду самти техникӣ (саноати хӯрокворӣ ва сабук) амал менамояд.

Ҳамоҳангсози лоиҳа Ирина Кулитане аз Донишгоҳи илмҳои ҳаётӣ ва технологияҳои Латвия (LBTU) иброз намуд, ки ҳадафи лоиҳа – таҳия ва татбиқи шакли нави таълим дар донишгоҳҳои аъзои консорсиум аз Осиёи Марказӣ мебошад. Раванди омӯзиш дар он ба шакли модулӣ амалӣ мешавад, ки якҷоя бо донишҷӯён ва таълимгирандагони берунӣ – шахсонеро, ки мақсади гирифтани донишҳои касбиро оид ба коркарди маҳсулоти хӯрокворӣ ва ё таҳсилоти олӣ доранд, фаро мегирад.

Амалишавии ин лоиҳа ба донишгоҳҳои ҳамшарик аз Осиёи Марказӣ имконияти нави амалӣ ва тайёр намудани мутахассисони рақобатпазири бозори меҳнатро дар самти саноати хӯрокворӣ фароҳам меоварад.

АКС: Донишгоҳи технологии Тоҷикистон